બેઝબોલ ક્રિકેટ રમી ભારતીય ટીમે તોડ્યો 22 વર્ષ જૂનો રેકોર્ડ, ટેસ્ટમાં 12.2 ઓવરમાં ફટકારી સેન્ચુરી
India vs West Indies 2nd Test: ભારતીય ક્રિકેટ ટીમ દુનિયાના સર્વશ્રેષ્ઠ ટીમમાંથી એક છે. ભારતીય ટીમ અને તેના ખેલાડીઓના નામે અનેક રેકોર્ડ છે. આ લિસ્ટમાં વધુ એક રેકોર્ડ જોડાયો છે. ચાલો જાણીએ આ નવા રેકોર્ડ વિશે.
ભારત અને વેસ્ટ ઈન્ડિઝ વચ્ચેની બીજી ટેસ્ટના ચોથા દિવસે રોમાંચક રમત જોવા મળી હતી. વેસ્ટ ઈન્ડિઝની ટીમ પ્રથમ ઈનિંગમાં ઓલઆઉટ થઈ હતી. બીજી ઈનિંગમાં ભારતીય ટીમે 181 રન બનાવીને વેસ્ટ ઈન્ડિઝને 365 રનનો ટાર્ગેટ આપ્યો હતો.અંતિમ દિવસે વેસ્ટ ઈન્ડિઝને જીત માટે 289 રનની અને ભારતીય ટીમને જીત માટે 8 વિકેટની જરુર છે.
પોર્ટ ઓફ સ્પેનમાં રમાઈ રહેલી આ મેચમાં ભારતીય ક્રિકેટ ટીમે ટેસ્ટ ક્રિકેટનો 22 વર્ષ જૂનો રેકોર્ડ તોડયો છે. ભારતીય ક્રિકેટ ટીમના ઓપનર્સ અને મિડલ ઓર્ડરના ખેલાડીઓએ આક્રમક રમત રમીને વર્લ્ડ રેકોર્ડ બનાવ્યો છે.
બીજી ટેસ્ટ મેચના ચોથા દિવસે બેઝબોલ સ્ટાઈલમાં ક્રિકેટ રમીને ભારતીય ટીમે માત્ર 12.2 ઓવરમાં 100 રન પૂરા કર્યા હતા. આ પહેલા આ રેકોર્ડ શ્રીલંકન ટીમના નામે હતો.
આ વર્લ્ડ રેકોર્ડ બનાવવામાં રોહિત શર્મા અને યશસ્વી જયસ્વાલનું મહત્વનું યોગદાન હતુ. બંનેએ સાથે મળીને 11.5 ઓવરમાં 98 રન બનાવી દીધા હતા.
શ્રીલંકાની ટીમે વર્ષ 2001ના સપ્ટેમ્બરમાં બાંગ્લાદેશ સામે કોલંબો ટેસ્ટ મેચમાં પહેલી ઈનિંગમાં 13.2 ઓવરમાં જ 100 રન બનાવી દીધા હતા.