48 કલાકમાં બદલાયું અર્જુન તેંડુલકરનું નસીબ, એક પણ વિકેટ ન મળી, ટીમ પણ ખરાબ રીતે હારી
વિજય હજારે ટ્રોફી 2024-25માં ગોવાની ટીમે તેની બીજી મેચ હરિયાણા સામે રમી હતી. સચિન તેંડુલકરનો પુત્ર અર્જુન તેંડુલકર આ મેચમાં સંપૂર્ણ રીતે ફ્લોપ રહ્યો હતો. આ સાથે જ ગોવાની ટીમને પણ 8 વિકેટથી હારનો સામનો કરવો પડ્યો હતો. આ પહેલા ગોવાએ ઓપનિંગ મેચમાં ઓડિશાને હરાવ્યું હતું.
સચિન તેંડુલકરનો પુત્ર અર્જુન તેંડુલકર હાલમાં વિજય હજારે ટ્રોફી 2024-25માં ગોવાની ટીમ તરફથી રમી રહ્યો છે. અર્જુન તેંડુલકરે આ ટૂર્નામેન્ટમાં ખૂબ જ સારી શરૂઆત કરી હતી. તે પહેલી જ મેચમાં પોતાની ટીમની જીતનો હીરો હતો. પરંતુ બીજી મેચમાં અલગ જ કહાની જોવા મળી હતી.
સોમવારે જયપુરના સવાઈ માનસિંહ સ્ટેડિયમમાં ગોવા અને હરિયાણાની ટીમો વચ્ચે મેચ રમાઈ હતી. આ મેચમાં અર્જુન તેંડુલકર સંપૂર્ણ રીતે ફ્લોપ રહ્યો હતો અને તેની ટીમને પણ હારનો સામનો કરવો પડ્યો હતો.
હરિયાણા સામે રમાયેલી મેચમાં અર્જુન તેંડુલકરને બેટિંગ અને બોલિંગ કરવાની તક મળી હતી. પરંતુ તે બંને વિભાગમાં ફ્લોપ રહ્યો હતો. આ મેચમાં પ્રથમ બેટિંગ કરતા અર્જુન તેંડુલકર 12 બોલમાં માત્ર 14 રન જ બનાવી શક્યો હતો જેમાં 1 ફોર અને 1 સિક્સ સામેલ હતી.
ત્યારબાદ અર્જુન તેંડુલકરે ટીમ માટે બોલિંગ શરૂ કરી, પરંતુ કોઈ સફળતા મેળવી શક્યો નહીં. અર્જુન તેંડુલકરે આ મેચમાં કુલ 5 ઓવર ફેંકી હતી, જે દરમિયાન તેણે 7ની ઈકોનોમી સાથે 35 રન આપ્યા હતા અને એક પણ સફળતા મેળવી શક્યો નહીં.
ગોવાની ટીમે ટૂર્નામેન્ટની તેની પ્રથમ મેચમાં ઓડિશાને હરાવ્યું હતું. તે મેચમાં ગોવાએ પ્રથમ બેટિંગ કરતા 50 ઓવરમાં 4 વિકેટ ગુમાવીને 371 રન બનાવ્યા હતા. આ પછી અર્જુન તેંડુલકરે ટાર્ગેટનો બચાવ કરતાં જોરદાર બોલિંગ કરી હતી. અર્જુન તેંડુલકરે 10 ઓવરમાં 6.10ના ઈકોનોમી રેટથી 61 રન આપ્યા અને કુલ 3 વિકેટ લીધી.
હરિયાણા સામે પ્રથમ બેટિંગ કરવા ઉતરેલી ગોવાની ટીમ 50 ઓવરમાં 7 વિકેટના નુકસાન પર 271 રન જ બનાવી શકી હતી. આ દરમિયાન ઈશાન ગાડેકરે સૌથી વધુ 83 રન બનાવ્યા હતા. જ્યારે દર્શન મિસાલે 75 રનનું યોગદાન આપ્યું હતું. બીજી તરફ હરિયાણાએ આ લક્ષ્યાંક 44.4 ઓવરમાં 2 વિકેટના નુકસાને હાંસલ કરી લીધો હતો. હરિયાણા તરફથી એચજે રાણા અને અંકિત કુમારે સદી ફટકારી હતી. (All Photo Credit : X / INSTAGRAM)
Published On - 7:56 pm, Mon, 23 December 24