ઊંડા કુવામાં પડી ગયું હાથીનું બચ્ચું, જુઓ JCB ની મદદથી કેવી રીતે બચાવવામાં આવ્યો જીવ

જંગલી પ્રાણીઓ જંગલોમાં ખૂબ જ નિરાંતે રહે છે, પરંતુ માણસો પોતાની સુવિધાઓની શોધમાં ત્યાં પહોંચી ગયા છે. તેમના રહેઠાણોને આપણે અનેક પ્રકારે નુકશાન પહોંચાડ્યું છે. આવી સ્થિતિમાં મનુષ્યની હરકતોના કારણે જંગલમાં રહેતા પ્રાણીઓને ઘણી સમસ્યાઓનો સામનો કરવો પડે છે. ઘણી વખત તેમના જીવન પર પણ વાત આવી જાય છે. ઘણી વાર આવા સમાચારો જોવામાં અને સાંભળવામાં આવે છે કે કોઈ પ્રાણીને માનવીના કારણે ઘણી અગવડ પડી. તો કેટલીકવાર એવા સમાચાર આવે છે કે કોઈ પ્રાણી કૂવામાં પડી ગયું છે, અથવા ક્યાંક ખાડામાં ફસાઈ ગયું છે.

આવી જ એક ઘટના તાજેતરમાં બની છે. જેમાં હાથીનું નાનું બાળક કૂવામાં પડી ગયું હતું, જે ખૂબ જ પ્રયત્નો બાદ પણ બહાર આવી શક્યું ન હતું. જેને લઈને હવે તસ્વીરો સોશિયલ મીડિયામાં વાયરલ થઇ રહી છે.

IFS અધિકારી પરવીન કાસવાને તેમના ટ્વિટર એકાઉન્ટ પર એક ફોટો શેર કર્યો છે, જેમાં એક નાનો હાથી કૂવામાં પડી ગયેલો છે. જેને બહાર કાઢવાના પ્રયાસ કરવામાં આવી રહ્યા છે. આ તસવીર ઝારખંડના એક ગામની છે. જ્યાં આ નાનો હાથી ખુલ્લા કૂવામાં પડી ગયો હતો. નાનો હાથી ઊંડા કૂવામાં ફસાઇ ગયો હતો. તે ખૂબ જ પ્રયત્ન કરતો રહ્યો પણ બહાર નીકળી શક્યો નહીં.

છેવટે હાથીને બહાર કાઢવા માટે JCB ની મદદ લેવી પડી. આ તસવીરોમાં જોઇ શકાય છે કે જેસીબીથી કૂવાની દિવાલ ખોદવામાં આવી હતી. તે પછી નાના હાથીના બહાર નીકળવાનો માર્ગ બનાવવામાં આવ્યો. હાથી બચાવની આ તસવીરો સોશિયલ મીડિયા પર વાયરલ થઈ રહી છે. લોકો આને એકબીજા સાથે શેર કરી રહ્યા છે, પરંતુ તેના પર વિવિધ ટિપ્પણીઓ અને પ્રતિક્રિયાઓ પણ આપી રહ્યા છે.

આ પણ વાંચો: મુંબઈમાં વેક્સિન આપવાની અનોખી વ્યવસ્થા, જાણો કઈ રીતે કારમાં બેઠા બેઠા જ અપાય છે વેક્સિન

આ પણ વાંચો: જો અચાનક શરીરમાં ઓક્સિજનનું લેવલ ઓછું થવા માંડે તો શું કરવું? જાણો આ ઘરેલું ઉપાય