Diwali 2021: 14,000 ફૂટની ઉંચાઈએ ITBPના જવાનોએ ફટાકડા ફોડીને દિવાળીની કરી ઉજવણી, જુઓ તસ્વીરો
Diwali 2021: ઈન્ડો-તિબેટીયન બોર્ડર પોલીસ (ITBP)ના જવાનો ઉત્તરાખંડ અને છત્તીસગઢમાં દિવાળીની ઉજવણી કરતા જોવા મળ્યા હતા. આ દરમિયાન તેમણે ફટાકડા પણ ફોડ્યા હતા.
દેશભરમાં આજે દિવાળી (Diwali 2021)ની ઉજવણી કરવામાં આવી રહી છે અને લોકો રોશની સાથે આ તહેવારની ઉજવણી કરી રહ્યા છે. આ દરમિયાન દેશભરના મંદિરોને શણગારવામાં આવ્યા છે. દેશના જુદા જુદા ભાગોમાંથી દિવાળીની ઉજવણી કરતા લોકોની તસ્વીરો સામે આવી રહી છે.
દેશની સરહદોની રક્ષા કરતા સૈનિકો પણ દિવાળીની ઉજવણી કરી રહ્યા છે. ઉત્તરાખંડમાં 14,000 ફૂટની ઊંચાઈએ સ્થિત બોર્ડર પોસ્ટ પર ઈન્ડો-તિબેટિયન બોર્ડર પોલીસ (ITBP)ના જવાનોએ દિવાળીની ઉજવણી કરી. ITBP દ્વારા જાહેર કરવામાં આવેલી તસવીરોમાં સૈનિકો ઉજવણી કરતા જોઈ શકાય છે.
છત્તીસગઢમાં પણ ITBP જવાનોએ દિવાળીની ઉજવણી કરી હતી. આ દરમિયાન સૈનિકો હાથમાં મીણબત્તીઓ લઈને રોશનીનો તહેવાર ઉજવતા જોવા મળ્યા હતા. સૈનિકોએ રંગોળી પણ બનાવી અને દેશવાસીઓને દિવાળીની શુભેચ્છા પાઠવી.
દિવાળીના અવસર પર રાજનાંદગાંવમાં ITBPના જવાન પણ ફટાકડા ફોડતા જોવા મળ્યા હતા. સાથે જ સૈનિકોએ એક પંક્તિમાં દીવા પ્રગટાવ્યા અને એકબીજાને મીઠાઈઓ ખવડાવી. વડાપ્રધાન નરેન્દ્ર મોદીએ પણ આજે સૈનિકો સાથે દિવાળીની ઉજવણી કરી હતી.
ગુરુવારે દિવાળીના અવસર પર પીએમ મોદી જમ્મુ-કાશ્મીરની સરહદે આવેલા રાજૌરી જિલ્લાના નૌશેરા સેક્ટર પહોંચ્યા અને સૈનિકો સાથે દિવાળી મનાવી હતી. આ દરમિયાન પીએમએ જવાનોને સંબોધતા કહ્યું કે 2016 (સર્જિકલ સ્ટ્રાઈક) ભારતીય સેનાની ક્ષમતા અને વ્યાવસાયિક કાર્યક્ષમતા દર્શાવે છે.