શરદ પવારનું NCP અધ્યક્ષ પદેથી રાજીનામું એક નાટક હતું, ભત્રીજા અજિત પવારનું મોટું નિવેદન

મહારાષ્ટ્રના નાયબ મુખ્યમંત્રી અજિત પવારે શુક્રવારે રાષ્ટ્રવાદી કોંગ્રેસ પાર્ટીના અધ્યક્ષ અને તેમના કાકા શરદ પવારને લઈને મોટું નિવેદન આપ્યું છે. તેમણે કહ્યું કે શરદ પવારનું એનસીપી અધ્યક્ષ પદ પરથી રાજીનામું એક નાટક હતું. અજિત પવારે કહ્યું કે અમે બધા સતત શરદ પવારને કહેતા હતા કે આપણે કામ માટે સરકાર પાસે જવું જોઈએ.

અજિત પવારે રાયગઢમાં ચાલી રહેલી પાર્ટીની બેઠકમાં આયોજિત પ્રેસ કોન્ફરન્સ દરમિયાન કહ્યું કે અમે શરદ પવારને મળ્યા અને તેમને આ વાત પણ કહી. આ પછી તેમણે કહ્યું કે હું રાજીનામું આપીશ, આ વાતની અમને પહેલાથી જ ખબર હતી. શરદ પવારે કહ્યું કે તમે સરકારમાં જોડાઓ અને હું રાજીનામું આપી રહ્યો છું, તે સમયે સુપ્રિયા સુલે પણ સરકારમાં સામેલ થવાના સમર્થનમાં હતા.

શરદ પવારના રાજીનામાને સ્ક્રિપ્ટેડ ગણાવતા, તેમણે વધુમાં કહ્યું કે શરદ પવારે પુસ્તક પ્રકાશન પ્રસંગે રાજીનામું આપ્યું હતું, પરંતુ તે પછી તરત જ તેમણે લોકોને તેમના સમર્થનમાં પ્રદર્શન કરવા અને તેમના રાજીનામાની પરત માંગ કરવા કહ્યું હતું. આ પછી તેમણે પોતાનું રાજીનામું પાછું ખેંચી લીધું હતું. જો તમે રાજીનામું આપવા માંગતા ન હતા તો આવું નાટક શા માટે?

અજિત પવારે શું કહ્યું?

અજિત પવારે દાવો કર્યો કે સરકારમાં સામેલ થયા બાદ શરદ પવારે તમામ મંત્રીઓને મળવા બોલાવ્યા અને પછી બીજા દિવસે તેમણે ધારાસભ્યોને પણ મળવા બોલાવ્યા. તેમણે મીટીંગમાં બધું સાંભળ્યું અને કહ્યું, ઠીક છે, અમે કહીશું. પછી નિવેદનો આવવા લાગ્યા. 12 ઓગસ્ટના રોજ તેમને પૂણેમાં એક બિઝનેસમેનના ઘરે બોલાવવામાં આવ્યા, જ્યાં શરદ પવાર, અજિત પવાર, જયંત પાટીલ અને બિઝનેસમેન હાજર હતા, ત્યાં પણ એવું કહેવામાં આવ્યું કે બધું સારું થઈ જશે.

ભાજપમાં જોડાવાનું રહસ્ય ખોલ્યું

બીજેપીમાં સામેલ થવા પર અજિત પવારે કહ્યું કે કેટલાક લોકો કહે છે કે તેમની સામેના કેસને કારણે તેઓ ભાજપમાં ગયા હતા. આવા અનેક આરોપો લગાવવામાં આવ્યા હતા. હું 32 વર્ષથી કામ કરી રહ્યો છું અને જે બોલું છું તે કરું પણ છું. હું ભલે સંગઠનનો પ્રદેશ પ્રમુખ ન બન્યો પણ સંગઠનનું કામ કોણ કરે છે અને કોણે કર્યું છે તે સૌ જાણે છે. હું જે કહું છું તે ખોટું નથી.