Breaking News : નવરાત્રિ કાર્યક્રમમાં દલેર મહેંદી નશાની હાલતમાં પહોંચ્યા, કેબિનેટ મંત્રીએ લગાવી ફટકાર, કહ્યું-બોલાતુ નથી તો ગાશો શું!
દલેર મહેંદીને ઉત્તરાખંડના ટિહરી જિલ્લાના નરેન્દ્ર નગરમાં યોજાયેલા 'કુંજાપુરી મેળા' દરમિયાન નવરાત્રિના એક કાર્યક્રમમાં પરફોર્મ કરવા માટે આમંત્રિત કરવામાં આવ્યા હતા. જ્યારે મહેંદી સ્ટેજ પર પરફોર્મ કરી રહ્યા હતા, ત્યારે કેબિનેટ મંત્રી સુબોધ ઉનિયાલે ત્યાં પહોંચીને ગાયકની કથિત નશાની હાલત સામે વાંધો ઉઠાવ્યો હતો
પ્રખ્યાત ગાયક દલેર મહેંદી સોશિયલ મીડિયા પર ચર્ચાનો વિષય બન્યા છે. ઉત્તરાખંડમાં નવરાત્રિના એક કાર્યક્રમ દરમિયાન, કેબિનેટ મંત્રી સુબોધ ઉનિયાલે તેમને સખત શબ્દોમાં ઠપકો આપ્યો હતો. મંત્રીનો આરોપ છે કે ગાયક સ્ટેજ પર પરફોર્મ કરતી વખતે નશાની હાલતમાં હતા. આ ઘટનાનો એક વીડિયો સોશિયલ મીડિયા પર વાયરલ થયો છે, જેમાં મંત્રી સુબોધ ઉનિયાલ દલેર મહેંદીને ઠપકો આપતા જોવા મળે છે. વીડિયોમાં મંત્રી ગાયકની નશાની હાલત તરફ ઈશારો કરે છે અને તેમને ગાતા અટકાવતા કહે છે, “તમારાથી બરાબર બોલાતું પણ નથી તો તમે ગાશો કેવી રીતે?”
નવરાત્રિ કાર્યક્રમમાં દલેર મહેંદી
દલેર મહેંદીને ઉત્તરાખંડના ટિહરી જિલ્લાના નરેન્દ્ર નગરમાં યોજાયેલા ‘કુંજાપુરી મેળા’ દરમિયાન નવરાત્રિના એક કાર્યક્રમમાં પરફોર્મ કરવા માટે આમંત્રિત કરવામાં આવ્યા હતા. જ્યારે મહેંદી સ્ટેજ પર પરફોર્મ કરી રહ્યા હતા, ત્યારે કેબિનેટ મંત્રી સુબોધ ઉનિયાલે ત્યાં પહોંચીને ગાયકની કથિત નશાની હાલત સામે વાંધો ઉઠાવ્યો હતો. મંત્રીએ કાર્યક્રમ અટકાવી દીધો અને ભારપૂર્વક કહ્યું કે આ આયોજન દેવી દુર્ગાની આરાધના માટે છે, અને આવા ધાર્મિક પ્રસંગોએ કલાકારોએ મર્યાદા જાળવવી જોઈએ.
મંત્રીએ ભડકી ઉઠ્યા
સ્ટેજ પર પહોંચીને મંત્રી સુબોધ ઉનિયાલ દલેર મહેંદી પર ભડકી ઉઠ્યા હતા. વાયરલ વીડિયોમાં મંત્રી ગાયકને રોકતા પૂછે છે, “તમે બરાબર બોલી પણ શકતા નથી, તો ગાશો કેવી રીતે? દુર્ગા પૂજા સાથે જોડાયેલા કાર્યક્રમમાં નશાની હાલતમાં પરફોર્મ કરવું સ્વીકાર્ય નથી.” મંત્રીએ હસ્તક્ષેપ કરીને કાર્યક્રમ અટકાવી દીધો, જેના કારણે ગાયક પોતાનું પરફોર્મન્સ ચાલુ રાખી શક્યા નહીં.
મંત્રી સુબોધે ગાયક સામે આરોપો લગાવ્યા
દરમિયાન, મંત્રી સુબોધ ઉનિયાલે આ મામલે ‘ધ ઈન્ડિયન એક્સપ્રેસ’ સાથે વાત કરી છે. તેમણે જણાવ્યું, “દલેર મહેંદી એક જાણીતા કલાકાર છે, તેમ છતાં કાર્યક્રમ દરમિયાન તેઓ નશાની હાલતમાં હતા. અમે દર વર્ષે આ કાર્યક્રમનું આયોજન કરીએ છીએ. ગાયકને કાર્યક્રમમાં પ્રસ્તુતિ આપવા માટે લાખો રૂપિયા ચૂકવવામાં આવ્યા હતા અને તેમના મુસાફરીના ખર્ચની પણ વ્યવસ્થા કરવામાં આવી હતી. જોકે, તેઓ નશાની હાલતમાં કાર્યક્રમમાં પહોંચ્યા અને મંચ પર યોગ્ય રીતે ગાઈ શક્યા નહીં; પરિણામે, મારે પોતે મંચ પર જઈને તેમનો કાર્યક્રમ અટકાવવો પડ્યો.”
