ટ્રકની પાછળ ‘Horn OK Please’ શા માટે લખવામા આવે છે ? જાણો કારણ
તમે ઘણી વાર ટ્રકની પાછળ હોર્ન ઓકે પ્લીઝ લખેલું જોયું હશે, પરંતુ આ રીતે લખવા પાછળનું સાચું કારણ કદાચ તમને ખબર નહીં હોય. ટ્રક ચાલકો આવું કેમ લખે છે તેની પાછળનું કારણ અમે તમને જણાવી રહ્યા છીએ.
દેશમાં ટ્રકની પાછળ વિવિધ પ્રકારની શાયરીઓ, સ્લોગન અને સૂત્રો લખવાનો ટ્રેન્ડ છેલ્લા ઘણા સમયથી ચાલી રહ્યો છે. જો કે, આમાં સૌથી વધુ લોકપ્રિય ‘Horn OK Please’ છે જે નાનીથી મોટી તમામ પ્રકારની ટ્રકોની પાછળ જોવા મળે છે. આ લાઈન એટલી ફેમસ છે કે તેના પર બોલિવૂડ ફિલ્મ પણ બની છે.
જો કે નિયમો મુજબ ટ્રક પર આ લાઈન લખવી જરૂરી નથી, તો પછી આ લાઇન લખવાનું ચલણ ક્યાંથી આવ્યું ? મોટાભાગના લોકો કદાચ આ પાછળનું કારણ નહીં જાણતા હોય, તેથી આજે અમે તમને જણાવીશું કે ટ્રકની પાછળના 'Horn Ok Please' શા માટે લખવામાં આવે છે.
જાણો શું છે અર્થ- ટ્રકની પાછળ હોર્ન ઓકે પ્લીઝ લખાણના આમ તો ઘણા મતલબ છે પરંતુ સૌથી સામાન્ય અર્થ એ છે કે ઓવરટેક કરતા પહેલા હોર્ન વગાડીને ચેતવણી આપવી. ટ્રકો મોટી અને ભારે હોય છે તેથી તેને ઝડપથી ટર્ન આપવો મુશ્કેલ હોય છે. આવી સ્થિતિમાં, જો પાછળથી આવતા વાહને આગળ જતા ટ્રકને ઓવરટેક કરવાનું હોય, તો ટ્રકનો હોર્ન વાગવાથી, ડ્રાઇવરને માહિતી મળે છે કે પાછળથી આવતું વાહન ઓવરટેક કરવા માંગે છે અને ટ્રક ચાલક તે વાહનને પસાર થવા દે છે.
પણ OK કેમ લખાય છે?- “Horn Ok Please” માં ઓકે લખવા માટે ઘણા કારણો આપવામાં આવ્યા છે. જેનું એક કારણ એ હતું કે બીજા વિશ્વયુદ્ધ દરમિયાન ડીઝલની ભારે અછત હતી. આવી સ્થિતિમાં, ટ્રકો કેરોસીન પર ચાલતી હતી અને તેમાં કેરોસીન પણ પાછળના કન્ટેનરમાં રાખવામાં આવતું હતું જે ખૂબ જ જ્વલનશીલ હતું. જેથી પાછળથી આવતા વાહનોને ચેતવણી આપવા માટે ટ્રકની પાછળ OK એટલે કે ઓન કેરોસીન (On Kerosine) લખેલું હતું.
આ બીજું કારણ છે- આપણે અગાઉ કહ્યું તેમ, હોર્ન ઓકે પ્લીઝ લખવા પાછળ ઘણા કારણો છે. તેનું બીજું કારણ એ છે કે જૂના જમાનામાં મોટાભાગના રસ્તાઓ સાંકડા હતા અને વાહનોને એકબીજાથી આગળ નીકળી જવા માટે બહુ ઓછી જગ્યા હતી. જેના કારણે અકસ્માત થવાનું પણ જોખમ હતું.
આવી સ્થિતિમાં મોટી ટ્રકોની પાછળ Horn Ok Please લખેલું હતું અને Ok ની ઉપર એક બલ્બ પણ હતો. ઓવરટેક કરતા વાહનો પહેલા હોર્ન મારે એટલે ટ્રક ડ્રાઇવર લાલ બલ્બ ઓન કરી ઓવરટેક કરવા સંકેત આપે.