ફ્રાન્સ ભારતને સંરક્ષણ ટેક્નોલોજીમાં મદદ કરવાનું ચાલુ રાખશે, NSA અજીત ડોભાલે ઈન્ડો-પેસિફિક ક્ષેત્રમાં સહકાર અંગે બેઠક યોજી
ફ્રાન્સે ભારતને અત્યાધુનિક મિલિટરી ટેક્નોલોજીમાં મદદની ખાતરી આપી હતી. આ સિવાય ઈન્ડો-પેસિફિક ક્ષેત્રમાં દરિયાઈ સુરક્ષાને મજબૂત કરવા અને સંરક્ષણ, અવકાશ અને સુરક્ષાના ક્ષેત્રમાં સહયોગ પર પણ વાતચીત થઈ હતી.
ભારતના રાષ્ટ્રીય સુરક્ષા સલાહકાર (NSA) અજીત ડોભાલે (Ajit Doval) શનિવારે પેરિસમાં તેમના ફ્રેન્ચ સમકક્ષ ઇમેન્યુઅલ બોન સાથે મુલાકાત કરી અને બંને દેશો વચ્ચે વાર્ષિક વ્યૂહાત્મક સંવાદમાં ભાગ લીધો. આ દરમિયાન ફ્રાન્સે (France) ભારતને અત્યાધુનિક મિલિટરી ટેક્નોલોજીમાં મદદની ખાતરી આપી હતી. આ સિવાય ઈન્ડો-પેસિફિક ક્ષેત્ર (Indo-Pacific region)માં દરિયાઈ સુરક્ષાને મજબૂત કરવા અને સંરક્ષણ, અવકાશ અને સુરક્ષાના ક્ષેત્રમાં સહયોગ પર પણ વાતચીત થઈ હતી.
પેરિસમાં ભારતીય દૂતાવાસે એક નિવેદન જારી કરીને કહ્યું કે ડોભાલ અને બોને વૈશ્વિક અને પ્રાદેશિક હિતના અનેક મુદ્દાઓની ચર્ચા કરી. નિવેદન અનુસાર, “ફ્રાંસે ઈન્ડો-પેસિફિક ક્ષેત્રની સુરક્ષા અને આ વ્યૂહાત્મક ક્ષેત્રમાં એક મજબૂત સ્તંભ તરીકે ભારત સાથેની ભાગીદારી માટે તેની પ્રતિબદ્ધતાનો પુનરોચ્ચાર કર્યો.” NSA ડોભાલે એમ પણ કહ્યું કે ફ્રાન્સ ભારતનું અગ્રણી વૈશ્વિક અને ઈન્ડો-પેસિફિક ભાગીદાર છે.
બંને દેશો ગુપ્તચર માહિતી અને માહિતીના આદાનપ્રદાનને વધારીને દ્વિપક્ષીય સંરક્ષણ સહયોગ અને સુરક્ષા ભાગીદારીને મજબૂત કરવા સંમત થયા હતા. નિવેદનમાં કહેવામાં આવ્યું છે કે, “ફ્રાન્સે વડાપ્રધાન નરેન્દ્ર મોદીના આત્મનિર્ભર ભારતના વિઝનને પુનરોચ્ચાર કર્યો છે અને આધુનિક ક્ષમતાઓ સાથે ભારતમાં સંરક્ષણ ઔદ્યોગિકીકરણ, સંશોધન અને ટેક્નોલોજી વિકાસને સંપૂર્ણ સમર્થન આપવાની તેની પ્રતિબદ્ધતાનો પુનરોચ્ચાર કર્યો છે.”
બંને દેશોએ વૈશ્વિક સુરક્ષાના મુદ્દાઓ પર પણ ચર્ચા કરી હતી. જેમાં અફઘાનિસ્તાન, આફ્રિકા, દક્ષિણ-પૂર્વ એશિયા અને પશ્ચિમ એશિયાની સ્થિતિ સામેલ છે. આ ઉપરાંત આતંકવાદના વધતા પડકાર, દરિયાઈ, સાયબર, અવકાશના પરિદ્રશ્યમાં વધતા જોખમો પર પણ ચર્ચા કરવામાં આવી હતી. અજીત ડોભાલે ભારત-ફ્રાન્સ વાર્ષિક વ્યૂહાત્મક સંવાદ દરમિયાન ફ્રાન્સના વિદેશ પ્રધાન જીન-વેસ લે ડ્રિયન અને સંરક્ષણ પ્રધાન ફ્લોરેન્સ પાર્લીને પણ મળ્યા હતા.
‘ઇન્ડો-પેસિફિક ક્ષેત્રમાં શાંતિ માટે ભાગીદારીની મુખ્ય ભૂમિકા’
બેઠક દરમિયાન, બંને પક્ષોએ પુનરોચ્ચાર કર્યો કે ભારત-પેસિફિક ક્ષેત્રમાં શાંતિ, સ્થિરતા અને સુરક્ષાને વધારવામાં તેમની વ્યૂહાત્મક ભાગીદારીની મહત્વપૂર્ણ ભૂમિકા છે. રોમમાં તાજેતરના G-20 સમિટ દરમિયાન ફ્રાન્સના રાષ્ટ્રપતિ ઇમેન્યુઅલ મેક્રોન અને વડા પ્રધાન નરેન્દ્ર મોદી વચ્ચેની બેઠકમાં, ઇન્ડો-પેસિફિક ક્ષેત્રમાં વધતા દ્વિપક્ષીય સહયોગ વિશે વાતચીત કરવામાં આવી હતી.
વિદેશ મંત્રાલયે કહ્યું હતું કે બંને નેતાઓએ વિવિધ વિષયો પર ભારત-ફ્રાન્સના સહયોગ અંગે ચર્ચા કરી હતી અને વ્યૂહાત્મક ભાગીદારી પ્રત્યે તેમની પ્રતિબદ્ધતાની પુનઃ પુષ્ટિ કરી હતી. આ સાથે બંને નેતાઓએ વૈશ્વિક અને પ્રાદેશિક વિકાસ પર પણ ચર્ચા કરી હતી. તે જ સમયે, વડા પ્રધાન કાર્યાલયે એક ટ્વિટમાં કહ્યું કે ભારત અને ફ્રાન્સ વિવિધ ક્ષેત્રોમાં વ્યાપકપણે સહયોગ કરી રહ્યા છે. વડાપ્રધાન મોદી અને રાષ્ટ્રપતિ ઈમેન્યુઅલ મેક્રોન વચ્ચેની વાતચીત બંને દેશો વચ્ચેના દ્વિપક્ષીય સંબંધોને વેગ આપશે.
આ પણ વાંચો: ખેતીમાં પાણીની અછતને જળ સંચય થકી નિવારી શકાય! આ ગામના સફળ જળ સંચયના પ્રયાસથી ખેડૂતો બન્યા સમુદ્ધ
