Breaking News : જાપાનમાં આવ્યો 5.9 ની તીવ્રતાનો ભૂકંપ, 23 ઘાયલ, ટોક્યોમાં બ્લેકઆઉટ, ટ્રેન સેવાઓ સ્થગિત

રવિવારે વહેલી સવારે જાપાનમાં ભૂકંપના જોરદાર આંચકા અનુભવાયા હતા. ભૂકંપના આંચકાના કારણે રહેવાસીઓમાં ગભરાટ ફેલાયો હતો. ભૂકંપની પ્રાથમિક તીવ્રતા રિક્ટર સ્કેલ પર 5.9 માપવામાં આવી છે. પૂર્વ જાપાનના ઘણા વિસ્તારોમાં તેમજ રાજધાની ટોક્યોમાં પણ ભૂકંપનો આંચકો અનુભવાયો છે. સરકારી અધિકારીઓના જણાવ્યા અનુસાર, ભૂંકપને કારણે 23 લોકો ઘાયલ થયા છે. જોકે મોટાભાગના લોકોને નાની ઇજાઓ થવા પામી છે. સદનસીબે, ભૂકંપ બાદ સુનામીની કોઈ ચેતવણી જાહેર કરવામાં આવી નથી. જાપાન હવામાન એજન્સીના જણાવ્યા અનુસાર, ભૂકંપ દક્ષિણ ઇબારાકી પ્રીફેક્ચરમાં આવ્યો હતો, તેનું કેન્દ્ર લગભગ 70 કિલોમીટર ભૂગર્ભમાં હતું. આ પ્રદેશ વારંવાર ભૂકંપીય પ્રવૃત્તિ માટે જાણીતો છે. યુએસ ભૂસ્તરશાસ્ત્રીય સર્વે (USGS) એ 5.8 ની પ્રાથમિક તીવ્રતાનો અંદાજ લગાવ્યો હતો. 23ને ઈજા અધિકારીઓએ ચાર પ્રીફેક્ચરમાં કુલ 23 ઘાયલોની જાણ કરી: સૈતામામાં 9, કાનાગાવામાં 9, ચિબામાં 4 અને ઇબારાકીમાં 1. ભૂકંપ આવ્યો ત્યારે મોટાભાગના લોકો ઊંઘી રહ્યા હતા. અચાનક આવેલા જોરદાર આંચકાને કારણે તેઓ પડી ગયા અથવા ફર્નિચર અને દરવાજા સાથે અથડાઈ ગયા. અહેવાલો અનુસાર, કાનાગાવાના યોકોહામામાં 80 વર્ષથી વધુ ઉંમરની એક મહિલા તેના પલંગ પરથી પડી ગઈ અને તેના હિપને ગંભીર ઈજા થઈ.

આ સમાચાર હમણા જ બ્રેકિંગ સ્વરૂપે આવ્યા છે. આ સમાચારને અમે વધુ અપડેટ કરી રહ્યાં છીએ. વધુ વિગતો માટે અહીં ક્લિક કરો tv9gujarati.com..