મિશન 182 માટે ભાજપ (BJP) ના સંગઠને તડામાર તૈયારીઓ હાથ ધરી છે. ભાજપના પ્રદેશ પ્રમુખ સી. આર. પાટીલ (CR Patil) વન ડે વન ડિસ્ટ્રીક્ટ કાર્યક્રમ અંતર્ગત બે દિવસ સુરેન્દ્રનગર (Surendranagar) પ્રવાસે પહોંચશે. સી. આર. પાટીલ સાંજે સુરેન્દ્રનગર આવશે. જ્યાં વઢવાણના ઉપાસન સર્કલથી સાંજે 6 કલાકે રોડ શોનો પ્રારંભ થશે. આ રોડ શૉમાં ભાજપના આગેવાનો અને કાર્યકરો બાઈક રેલી સ્વરૂપે મોટી સંખ્યામાં જોડાશે. જે બાદ સી. આર. પાટીલ ભાજપના હોદ્દેદારો અને ચૂંટાયેલા જન પ્રતિનિધિઓ સાથે સંવાદ બેઠક કરશે. આ ઉપરાંત ભાજપના આગેવાનો સાથે બુથ અને પેજ સમિતિઓની સમીક્ષા કરશે. ભાજપ પ્રમુખ સી. આર. પાટીલ 23 જૂને સર્કિટ હાઉસમાં કાર્યકરોને મળશે. જે બાદ સંતો, મહંતો, કલાકારો, સાહિત્યકારો અને વિવિધ ધાર્મિક સંસ્થાના પ્રતિનિધિઓ સાથે બેઠક કરશે. સી. આર. પાટીલ 23 જૂને સવારે 11 કલાકે દિવ્યાંગ, વિવિધ યોજનાના લાભાર્થી અને શ્રમિકો સાથે સંવાદ કરશે.
સુરેન્દ્રનગરમાં 5 વિધાનસભા બેઠકોને લઈને સી. આર. પાટીલ ચર્ચા કરશે. ખાસ કરીને જિલ્લાની ચોટીલા, દસાડા, ધ્રાંગધ્રા, વઢવાણ, લીમડી બેઠકની સ્થિતિ પર ચર્ચા કરવામાં આવશે. જેમાં દસડા અને વઢવાણ બેઠક હાલ કોંગ્રેસ પાસે છે જે કબજે કરવાની રણનીતિ પર પણ ચર્ચા કરવામાં આવશે.
ઉલ્લેખનીય છે કે ભાજપના પ્રદેશ પ્રમુખ સી. આર. પાટીલ વન ડે વન ડિસ્ટ્રીક્ટ કાર્યક્રમ અંતર્ગત રાજ્યભરના પ્રવાસે છે. તેઓ વિવિધ જિલ્લામાં જઈને ત્યાં રોડ શો કરવાની સાથે ભાજપના આગેવાનો સાથે બેઠકો કરી આ જિલ્લાની બેઠકોની સમિક્ષા કરે છે. અત્યાર સુધી ભાજપના પ્રદેશ પ્રમુખ સી. આર. પાટીલ વન ડે વન ડિસ્ટ્રીક્ટ કાર્યક્રમ અંતર્ગત તાપી, નર્મદા, સુરત, અરવલ્લી, વડોદરા જિલ્લાની મુલાકાત લઈ ચૂક્યા છે.