મધર ઇન્ડિયા ફિલ્મમાં નરગીસ દત્તના ડમી તરીકે પાત્ર ભજવનાર ભીખીબેને કર્યુ મતદાન, જાણો શું કહ્યું

મહુવા તાલુકામાં મધર ઈન્ડિયા (Mother India) તરીકે ઓળખાતા ભીખીબહેન નાયકાએ આજે મતોત્સવમાં પોતાનો અમૂલ્ય મત આપ્યો હતો. ભીખીબહેને મધર ઈન્ડિયા ફિલ્મમાં નરગીસ દત્તના ડમી તરીકે પાત્ર ભજવ્યું હતું. ભીખી બહેને આજે તાલુકા અને જિલ્લા પંચાયતની ચૂંટણીમાં પોતાનો મત આપ્યો હતો.આ સાથે ભીખી બહેને લોકોને હંમેશા મતદાન કરવા માટે અપીલ કરી હતી.

ભીખી બહેનની ઉમંર અત્યારે 85 વર્ષની છે. ભીખી બહેન કહે છે કે જ્યારે મધર ઈન્ડિયાનું શૂટિંગ અમારા ગામની નજીકમાં ચાલતું હરું ત્યારે તેમની ઉંમર 15થી 17 વર્ષ જેટલી હતી. તેમણે કહ્યું કે શૂટિંગ દરમિયાન નરગીસ દાજી જતાં તેને હોસ્પિટલમાં લઈ જવાઈ હતી, જેથી ફિલ્મ નિર્માતા મહેબઉબે નરગીસના ચહેરા જેવા જ ચહેરાની શોધ ચલાવી અને ગામમાંથી એવી કોઈ યુવતીને શોધવાનું કહ્યું. ત્યારે ઉમરા અને આસપાસના ગામથી ચાલીસેક છોકરીઓને પસંદ કરવામાં આવી. અને તેમાંથી આ રોલ ભજવવા માટે ભીખી બહેનની પસંદગી કરવામાં આવી.

ભીખીબહેને ધો.૬ સુધી જ અભ્યાસ કરેલો છે. અને આજે પણ કોઈની પણ મદદ વગર પોતાના ઘરનું કામ પોતે જ કરે છે.