Ahmedabad: બેન્કના સિક્યુરિટી ગાર્ડ અને પોલીસકર્મી વચ્ચે બોલાચાલી બાદ ગાર્ડે ફાયરિંગ કરતાં થઈ જોવા જેવી
એરપોર્ટ પોલીસ મથકનાં જ એક કર્મચારી આજે તેમને રજા હોવાથી પોતાના અંગત કામ માટે તેની બાળકી સાથે બેંકમાં ગયા હતા. બાળકી સિક્યુરિટી ગાર્ડની ખુરશી પર બેઠી હતી જે બાબતે સિક્યુરિટી અને રાજેન્દ્રસિંહ વચ્ચે ઉગ્ર બોલાચાલી થઈ હતી.
બેંક (Bank) માં કામકાજ માટે આવેલા પોલીસકર્મી અને સિક્યુરિટી ગાર્ડ વચ્ચે નજીવી બાબતમાં થયેલી બોલાચાલીએ ઉગ્ર સ્વરૂપ ધારણ કર્યું. સિક્યુરિટી ગાર્ડ ફાયરિંગ (Firing) કર્યું જેમાં બેંકમાં કામ કરતી યુવતીને ઇજા પહોંચી હતી. આમ તો સામાન્ય તકરાર ઉગ્ર સ્વરૂપ ધારણ કરતી હોય છે તેવા અનેક કિસ્સાઓ સામે આવ્યા છે પરંતુ બેન્કની અંદર સિક્યુરિટી ગાર્ડ અને એક પોલીસકર્મી વચ્ચે થયેલી નજીવી બાબતે બોલાચાલીએ ઉગ્ર સ્વરૂપ ધારણ કર્યું હોવાનો કિસ્સો અમદાવાદ (Ahmedabad) સામે આવ્યો છે. શહેરના સરદારનગર વિસ્તારમાં આવેલી એસ.બી.આઇ બેંકમાં ગ્રાહક અને સિક્યુરિટી વચ્ચે સામાન્ય વાતમાં બોલાચાલી થઇ હતી જે બાદમાં સિક્યુરિટી દ્વારા એક રાઉન્ડ ફાયરિંગ કરવામાં આવ્યું હતું. ફાયરિંગમાં બેંકમાં જ કામ કરતી એક યુવતીને ઇજા પહોંચી હતી જેને સિવિલ હોસ્પિટલમાં સારવાર માટે ખસેડવામાં આવી છે.
પોલીસની પ્રાથમિક તપાસમાં એરપોર્ટ પોલીસ મથકનાં જ એક કર્મચારી આજે તેમને રજા હોવાથી પોતાના અંગત કામ માટે તેની બાળકી સાથે બેંકમાં ગયા હતા. બાળકી સિક્યુરિટી ગાર્ડની ખુરશી પર બેઠી હતી જે બાબતે સિક્યુરિટી અને રાજેન્દ્રસિંહ વચ્ચે ઉગ્ર બોલાચાલી થઈ હતી અને બાદમાં સિક્યુરિટી ગાર્ડ દ્વારા એક રાઉન્ડ ફાયરિંગ કરવામાં આવ્યું હતું. જેમાં બેંકમાં કામ કરતી એક યુવતીને ઇજા પહોંચી હતી. હાલતો એરપોર્ટ પોલીસે સમગ્ર મામલે વધુ તપાસ હાથ ધરી છે અને બેન્કનાં અન્ય કર્મચારીઓ તેમજ અધિકારીની પણ પૂછપરછ હાથ ધરાઇ છે. આ ઉપરાંત સીસીટીવીની મદદથી પણ પોલીસ સમગ્ર ઘટના અંગે તપાસ કરી રહી છે. પોલીસે ફાયરિંગ કરનાર સિક્યુરિટી ગાર્ડ ની અટકાયત કરી છે.
મહત્વનું છે કે જે રીતે સિક્યુરિટી ગાર્ડ દ્વારા બેન્કની અંદર જ ફાયરિંગ કરવામાં આવ્યું હતું ત્યારે સામાન્ય લોકો પણ ત્યાં હાજર હતા અને બેંકના સ્ટાફ પણ હાજર હતો ત્યારે સવાલ એ ઉભો થાય છે કે સિક્યુરિટી ગાર્ડનું આ રીતે ફાયરિંગ કરવું કેટલું યોગ્ય છે તો બીજી તરફ એ પણ જાણવું જરૂરી છે કે એવું તો શું કારણ બન્યું કે સિક્યુરિટી ગાર્ડ દ્વારા ફાયરિંગ કરવાની ફરજ પડી. જો કે આ તમામ પ્રશ્નોના જવાબ હવે પોલીસની તપાસમાં જ બહાર આવશે પરંતુ અત્યારની પરિસ્થિતિ મુજબ સિક્યુરિટી ગાર્ડ દ્વારા થયેલા ફાયરીંગ થી એક યુવતીને ઇજા પહોંચી છે. જો ફાયરિંગમાં કોઈ ગંભીર રીતે ઘાયલ થયું હોત અથવા તો કોઈનું મોત થયું હોત તો જવાબદાર કોણ એ પણ સૌથી સળગતો સવાલ ઊભો થઈ રહ્યો છે.