Ahmedabad: ગોંડલનાં યુવાનને મોતનો કલાક પહેલા આવી ગયો હતો અંદેશો ! દિપકે સોશિયલ મિડિયા પર LIVE થઈ દોસ્તોને કહ્યું આવજો અને જીવનદિપ બુઝાયો

Ahmedabad: કોરોનાનાં કપરા કાળમાં એક પછી એક ઘટનાઓ એવી સામે આવે છે કે જેને લઈને હ્રદય નિચોવાઈ જતું હોય છે. અનેક એવા વાયરલ વિડિયો સામે આવ્યા કે જેણે લોકોની વાચા છીનવી લીધી. આવો જ એક વિડિયો ગોડલનાં યુવકનો સામે આવ્યો કે જેણે અમદાવાદની હોસ્પિટલમાંથી જાણે મોતનો અંદેશો આવ્યો હોય તેમ પોસ્ટ કર્યો. 1 કલાક બાદ તેનું મૃત્યુ થઈ ગયું.

હજુ તો એકાદ કલાક પહેલા કોરોનાગ્રસ્ત યુવક સોશિયલ મીડિયા પર લાઇવ થયો હતો, મિત્રો સાથે વાત કરી હતી અને આ જ મિત્રનું કલાક બાદ મૃત્યુ થતા પરિવાર રીતસરનો ભાંગી પડ્યો હતો.  ગોંડલનો 40 વર્ષિય દિપક વિરડીયા સંક્રમિત થતા ખાનગી હોસ્પિટલમાં સારવાર હેઠળ હતો.

મિત્રોની યાદ આવતા તે સોશિયલ મીડિયામાં લાઇવ થયો. મિત્રો સાથે હાથ હલાવી વાત કરી અને આવજો કર્યું. કદાચ મિત્રોને પણ ખયાલ નહીં હોય કે દિપક તેઓને આખરી અલવિદા કહી રહ્યો છે. સોશિયલ મીડિયા પર લાઇવ પૂર્ણ થતાની સાથે જ દિપકનો જીવનદીપ પણ બુઝાયો. દિપકની આવી ઓચિંતી વિદાયથી તેના પરિવાર સાથે મિત્ર વર્તુળમાં ઘેરા શોકની લાગણી ફરી વળી છે.

દિપકે તેનાં દોસ્તોનાં નામે જે છેલ્લુ આવજો કર્યુ તે વિડિયો સોશિયલ મિડિયામાં વાયરલ થયું છે. મોત જાણે તેનો અંદાજો અને અંદેશો બંને આપી ગયું હોય એમ લાગતુ હતું. માત્ર એક કલાકમાં જીવનની બાજી ક્યારે મોતમાં પલટાઈ ગઈ તે ન તેના દોસ્તોને ખબર પડી કે ન તેના પરિવારને, કદાચ આનાથી વાકેફ હતો તો માત્ર દિપક કે જેનો હવે જીવનદિપ બુઝાઈ ચુક્યો છે.