કોરોનાની રસી માટે કાચો માલ આપવા હવે અમેરિકા થયુ તૈયાર, રસીના ઉત્પાદનમાં આવશે વેગ
ભારતના રાષ્ટ્રીય સુરક્ષા સલાહકાર અજીત ડોભાલે ( Ajit Doval ) યુએસના રાષ્ટ્રીય સુરક્ષા સલાહકાર ( US National Security Adviser ) જેક સુલિવાન સાથે ટેલિફોનીક વાતચીત કરી હતી. ત્યાર બાદ અમેરિકા ભારતને કોરોનાની રસી માટે કાચો માલ ( raw materials ) આપવા તૈયાર થયુ હોવાનું કહેવાય છે.
ભારતમાં કોરોનાની વિકટ પરિસ્થિતિ વચ્ચે અમેરિકાએ રસી માટે કાચો માલ ( raw materials ) પૂરો પાડવાની તૈયારી બતાવી છે. વિશેષ વાત એ છે કે દેશમાં કોરોના રોગચાળો ભયંકર રૂપ લઈ રહ્યો છે ત્યારે અમેરિકાએ ( યુ.એસ.એ.) ભારતમાં બનાવવામાં આવતી રસી માટે જરૂરી કાચા માલનો સપ્લાય અટકાવી દીધો છે. યુ.એસ.એ.ના વહીવટીતંત્રના આ પગલાથી ભારતીય કંપનીઓ અને ભારત સરકારની રસી બનાવવા અંગેની ચિંતામાં વધારો થયો હતો.
ભારત સરકાર અને રસીનું ઉત્પાદન કરતી કંપનીઓએ યુ.એસ.એ.ના આ નિર્ણયથી રાહતનો શ્વાસ લીધો. બીજી તરફ, યુએસએના વિદેશ સચિવ એન્ટોની બ્લિન્કને કહ્યું હતું કે રોગચાળા દ્વારા સર્જાયેલી ભયંકર પરિસ્થિતિમાં અમેરિકા સંપૂર્ણ રીતે ભારતની સાથે ઊભું છે. તેમણે કહ્યું હતું કે અમે ભારત સરકાર સાથે મળીને કામ કરી રહ્યા છીએ અને ભારતના આરોગ્ય કર્મચારીઓને વધારાની સહાય પૂરી પાડીશું. તેમણે ભારતને તમામ શક્ય મદદની ખાતરી આપી.
કાચો માલ આપવા કરી હતી વિનંતી
કોરોનાની રસી બનાવવા માટે જરૂરી કાચા માલના સપ્લાય પરનો પ્રતિબંધ હટાવવા ભારત તરફથી અનેક વિનંતીઓ બાદ હવે યુનાઇટેડ સ્ટેટ્સ સંમત થઈ ગયું છે. વિદેશ પ્રધાન બ્લિંકેને ટ્વિટર દ્વારા આ માહિતી આપી છે કે, કોવિડ -19 રોગચાળો ફાટી નીકળવાની સ્થિતિમાં અમે ભારતના લોકોની સાથે છીએ. અમે ભારતમાં અમારા ભાગીદારો સાથે સંપર્કમાં છીએ. ટૂંક સમયમાં ભારતના લોકો અને કોવિડ સામે લડનારા લોકોના સમર્થનમાં વધારાની મદદ મોકલીશું.
ભારતના રાષ્ટ્રીય સુરક્ષા સલાહકાર અજીત ડોભાલે યુએસના રાષ્ટ્રીય સુરક્ષા સલાહકાર જેક સુલિવાન સાથે ટેલિફોનીક વાતચીત કરી હતી. ત્યાર બાદ, યુએસના રાષ્ટ્રીય સુરક્ષા સલાહકાર જેક સુલિવાને પણ કહ્યું છે કે અમને કોરોના રોગચાળા અંગે ગંભીર ચિંતા છે. અમે અમારા ભારતીય મિત્રોને વધુ સહાય અને પુરવઠો પૂરા પાડવા માટે રાત-દિવસ કામ કરી રહ્યા છીએ. અમે ભારતની આ લડાઇમાં ભાગીદાર છીએ. અમે ટૂંક સમયમાં સપ્લાય કરીશું.
સીરમ કંપનીની કેન્દ્ર સરકારને અપીલ
ભારતમાં રસીનું ઉત્પાદન કરતી સીરમ ઇન્સ્ટિટ્યૂટ ઓફ ઇન્ડિયાએ તાજેતરમાં કાચા માલની અછત અંગે ચિંતા વ્યક્ત કરી હતી. સીરમ સંસ્થાના વડા આદર પૂનાવાલાને યુ.એસ.ના નિકાસ પ્રતિબંધોને લીધે રસી ઉત્પાદનમાં ઉપયોગમાં લેવામાં આવતી પ્લાસ્ટિકની થેલીઓ અને ફિલ્ટરની અછત સર્જાવાની ભીતી હતી. કંપનીએ જાહેર કર્યુ હતું કે અમેરિકાએ મૂકેલા નિકાસ પ્રતિબંધને કારણે સિંગલ યુઝ ટ્યુબિંગ અને ખાસ કેમિકલ્સ આયાત કરવામાં મુશ્કેલીનો સામનો કરવો પડી રહ્યો છે. જેના કારણે રસીના ઉત્પાદન ઉપર તેની અસર વર્તાઈ રહી છે. જો આમને આમ વધુ ચાલ્યુ તો રસી ઉત્પાદન કરવી અશક્ય થશે. સીરમ કંપનીએ કેન્દ્ર સરકારને એક પત્ર લખીને આ મામલે દખલગીરી કરવાની વિનંતી કરી હતી. જેથી કોઈ પણ વિક્ષેપ વિના રસી પેદા કરી શકાય.
