UPSC Success Story: બીજા પ્રયાસમાં બની IPS અને ત્રીજા પ્રયાસમાં IAS બનવાનું સ્વપ્ન કર્યું પૂર્ણ, જાણો નમ્રતાનો સફળતાનો મંત્ર
UPSC Success Story: IAS અધિકારી નમ્રતા જૈને સાબિત કર્યું કે, મુશ્કેલ પરિસ્થિતિઓ હોવા છતાં, તમારું સ્વપ્ન પૂર્ણ થઈ શકે છે.
દર વર્ષે લાખો વિદ્યાર્થીઓ દેશની સૌથી પ્રતિષ્ઠિત પરીક્ષા એટલે કે UPSC સિવિલ સર્વિસિસ પરીક્ષામાં ભાગ લે છે. પરંતુ કેટલાક વિદ્યાર્થીઓની સફળતાની વાત એવી છે કે, તે દરેક વિદ્યાર્થી માટે પ્રેરણા બની જાય છે. છત્તીસગઢના દંતેવાડા જિલ્લાની રહેવાસી નમ્રતા જૈનની વાત પણ આવી જ છે. IAS અધિકારી નમ્રતા જૈને સાબિત કર્યું કે, મુશ્કેલ સંજોગો હોવા છતાં વ્યક્તિનું સપનું પૂરું થઈ શકે છે.
છત્તીસગઢના દંતેવાડા જિલ્લાની ગણતરી સૌથી મોટા નક્સલ પ્રભાવિત વિસ્તારોમાં થાય છે. આવા નક્સલ પ્રભાવિત જિલ્લાની રહેવાસી નમ્રતા જૈને પહેલા IPSની પરીક્ષા પાસ કરી અને પછી IAS બની. નમ્રતાએ તેના અભ્યાસ દરમિયાન આવી મુશ્કેલીઓનો સામનો કર્યો છે જેની કલ્પના કરવી મુશ્કેલ છે. જ્યાં હત્યા, વિસ્ફોટ અને પાવર આઉટેજની સમસ્યા હોય તેવા સ્થળેથી અભ્યાસ કરીને IAS બનવું સહેલું નથી.
નમ્રતા જૈને એક ઈન્ટરવ્યુમાં કહ્યું હતું કે, 'નક્સલવાદીઓએ તેના નગરમાં એક પોલીસ સ્ટેશનમાં વિસ્ફોટ કર્યો હતો. આ ઘટના પછી જ્યારે ચારે બાજુ ડરનું વાતાવરણ હતું, નમ્રતાએ તેમાંથી પ્રેરણા લીધી અને વિકાસ લાવવાનું નક્કી કર્યું. નમ્રતાએ તેનું પ્રારંભિક શિક્ષણ દંતેવાડાના કાર્લીની નિર્મલ નિકેતન સ્કૂલમાંથી કર્યું. પરંતુ 10 પાસ કર્યા પછી તે મુશ્કેલ બન્યું કારણ કે, તેના પરિવારના સભ્યોએ તેને વધુ અભ્યાસ માટે બહાર મોકલવાનો ઇનકાર કર્યો હતો. જોકે, નમ્રતાની માતાએ તેને ટેકો આપ્યો અને પરિવારના સભ્યોને નમ્રતાનો અભ્યાસ કરવા સમજાવ્યા હતા આ પછી, નમ્રતાએ 5 વર્ષ ભિલાઈમાં અભ્યાસ કર્યો અને 3 વર્ષ દિલ્હીમાં રહી.
નમ્રતાએ 2015માં પ્રથમ વખત UPSCની પરીક્ષા આપી હતી, પરંતુ તે પાસ થઈ શકી નહોતી. આ પછી 2016ની પરીક્ષામાં 99મો રેન્ક મેળવવા છતાં તે IAS બની શકી નહીં. તે મધ્યપ્રદેશ કેડરની IPS બની. જોકે નમ્રતાનું ધ્યેય આઇએએસ બનવાનું હતું, તે હૈદરાબાદમાં સરદાર વલ્લભભાઇ પટેલ રાષ્ટ્રીય પોલીસ એકેડમીમાં તાલીમ દરમિયાન પણ યુપીએસસીની તૈયારી કરતી રહી.
વર્ષ 2018માં તેણે ફરી એક વખત પોતાનું નસીબ અજમાવ્યું. આ વખતે તેની મહેનત ફળી અને તેણે ઓલ ઈન્ડિયામાં 12મો રેન્ક મેળવ્યો અને આઈએએસ બનવાનું તેનું સપનું પૂરું કર્યું. નમ્રતા કહે છે, તમારે આ આખી યાત્રામાં ધીરજ રાખવી પડશે, તમને સફળતા નહીં મળે, ભૂલો થશે પણ હિંમત ન હારશો.