Bitcoin નો ભાવ રૂ.35 લાખ નજીક પહોંચ્યો, ક્રિપ્ટોકરન્સીમાં વેપાર વધવાની આશાએ ભાવ વધ્યો

અમેરિકાની સૌથી મોટી ઈલેક્ટ્રિક કાર ઉત્પાદક ટેસ્લાએ ક્રિપ્ટોકરન્સી બિટકોઈનમાં કારનું પેમેન્ટ સ્વીકારવાની જાહેરાત કર્યા પછી સતત બીજા દિવસે બિટકોઈનના ભાવમાં વિક્રમી ઊછાળો આવ્યો છે અને તે વધીને 48 હજાર ડોલર એટલે કે અંદાજે રૂ.35 લાખની નજીક પહોંચી ગયો હતો. ક્રિપ્ટો કરન્સીના વિશ્વ બજારમાં ફેબુ્રઆરીથી શરૂ થયેલી તેજીમાં ટેસ્લાની જાહેરાતે આગમાં ઘી રેડવાનું કામ કર્યું હતું. પરિણામે બિટકોઈનના ભાવ અભૂતપૂર્વ ઉછાળાના પગલે નવા વિક્રમી સ્તરે પહોંચ્યા છે. ભારતીય રિઝર્વ બેન્કે પણ પોતાની ક્રિપ્ટો કરન્સી લાવવા અંગે વિચારણા શરૂ કરી હોવાથી ભારતમાં ડિજિટલ કરન્સી વધવાની આશા છે.. ભારતીય ચલણમાં જોઈએ તો એક બિટકોઈનનો ભાવ રૂ.34.98 લાખને વટાવી ગયો હતો. બિટકોઈનમાં આ વર્ષે 62 ટકા અને ગયા વર્ષની સરખામણીએ 300 ટકાનો ઊછાળો આવ્યો છે. ભારત અને ચીન સહિત અનેક દેશો પોતાની ડિજિટલ કરન્સી રજૂ કરવાની તૈયારી કરી રહ્યા હોવાથી ક્રિપ્ટો કરન્સી હવે વૈશ્વિક નાણાં બજારના મુખ્ય પ્રવાહમાં આવવાની આશા પ્રબળ બની છે. વધુમાં હવે મોટી કંપનીઓ અને ઈન્વેસ્ટમેન્ટ હાઉસીસ પણ ક્રિપ્ટો કરન્સીમાં રોકાણ કરે તેવી સંભાવના વધી છે.