ઘરની મહિલાઓ સતત રહે છે પરેશાન ? ભૂલોથી ભરેલું હોઈ શકે છે તમારા ઘરના રસોડાનું વાસ્તુ

ઘર વાસ્તુશાસ્ત્ર અનુસાર બનેલું હોય તો જ તેમાં ખુશીઓનું આગમન થતું હોય છે. એમાં પણ, ઘરનું રસોડું વાસ્તુ અનુસાર હોય તે ખૂબ જ જરૂરી છે. કહે છે કે ઘરના રસોડામાં જો વાસ્તુદોષ હોય તો તેની સૌથી વિપરીત અને સર્વ પ્રથમ અસર ઘરની મહિલા પર જોવા મળે છે.

એટલું જ નહીં, પરિવારજનોને અનેકવિધ સમસ્યાઓનો સામનો પણ કરવો પડે છે. ત્યારે આવો જાણીએ કે રસોડાના વાસ્તુદોષને લીધે કેવી-કેવી મુશ્કેલીઓ આપને પરેશાન કરી શકે છે તેમજ કોઈપણ પ્રકારની તોડફોડ વિના કઈ રીતે રસોડાના વાસ્તુદોષને દૂર કરી શકાય ?

રસોડું અને વાસ્તુ

⦁ રસોડાને ઘરનો સૌથી મહત્વપૂર્ણ ભાગ માનવામાં આવે છે. વાસ્તુ અનુસાર રસોડામાં જો કોઇ દોષ હોય તો ઘરમાં ક્યારેય શાંતિ નથી રહેતી.

⦁ રસોડામાં વાસ્તુદોષ હોય તો તેનાથી પરિવારજનોના સંબંધોમાં તિરાડ પડી શકે છે. ત્યાં સુધી કે બાળકોના વિવાહમાં પણ વિઘ્ન આવી શકે છે.

⦁ શાસ્ત્રો અનુસાર ઘરનું રસોડું ખોટી દિશામાં બનેલું હોય તો તેની નકારાત્મક અસર સૌપ્રથમ ઘરની મહિલાઓ પર પડે છે.

⦁ આજના સમયમાં જગ્યાના અભાવમાં અને સુવિધા અનુસાર લોકો રસોડાનું નિર્માણ કરાવતા હોય છે. જે ઘણાં વાસ્તુદોષોને આમંત્રણ આપી દે છે.

⦁ જો રસોડું ખોટી દિશામાં બની ગયું હોય અને તોડફોડ કરવી શક્ય ન હોય તો રસોડાની આંતરિક વ્યવસ્થામાં પરિવર્તન કરીને પણ વાસ્તુદોષ દૂર કરી શકાય છે અને તે કરવું અનિવાર્ય પણ મનાય છે.

કેવું હોવું જોઇએ ઘરનું રસોડું ?

⦁ ઘરમાં રસોડાની દિશા દક્ષિણ-પૂર્વ હોવી જોઇએ. રસોડા માટે આ દિશા સર્વશ્રેષ્ઠ મનાય છે. શાસ્ત્રો અનુસાર રસોડું જો દક્ષિણ-પશ્ચિમ દિશામાં બનેલું હોય તો તે સૌથી મોટો વાસ્તુદોષ ગણાય છે. તેના કારણે ઘરના લોકો રોગ, કલેશ અને કંકાસમાં જ રહે છે.

⦁ રસોડામાં ગેસ અગ્નિ ખૂણામાં રાખવો જોઇએ.

⦁ રસોડામાં ભોજન કરતી વખતે મુખ હંમેશા પૂર્વ દિશામાં રહે તે રીતે ગોઠવણ કરવી જોઈએ. તે ઉત્તમ મનાય છે. તેનાથી પરિવારજનોનું સ્વાસ્થ્ય સારું રહે છે અને ધનમાં વૃદ્ધિ થાય છે.

⦁ જો ફ્રિજ રસોડામાં રાખેલું હોય તો તેને દક્ષિણ કે પશ્ચિમ દિશામાં રાખવું. ઇશાન કે નૈઋત્ય ખૂણામાં રેફ્રિજરેટરનું સ્થાન ક્યારેય ન રાખવું. આ પ્રકારની ગોઠવણ વાસ્તુ અનુસાર યોગ્ય માનવામાં નથી આવતી.

રસોડાનો વાસ્તુદોષ દૂર કરવાના ઉપાયો

⦁ જો આપનું રસોડું વાસ્તુ અનુસાર સાચી દિશામાં નથી તો રસોડાની દક્ષિણ-પૂર્વ દિશામાં એક લાલ રંગનો બલ્બ લગાવી દો. તેને હંમેશા ચાલું જ રહેવા દો. માન્યતા છે કે આ ઉપાયથી વાસ્તુદોષનો પ્રભાવ ઓછો થઈ જાય છે.

⦁ રસોડાના વાસ્તુદોષને દૂર કરવા રસોડાની દિવાલો પર આછા નારંગી રંગનો રંગ કરાવો. આ ઉપાય શુભતામાં વૃદ્ધિ કરશે સાથે જ સકારાત્મક ઊર્જાને પ્રવાહિત કરશે.

⦁ કેટલાક લોકો સજાવટ માટે રસોડામાં કાળા રંગનો પત્થર લગાવે છે. વાસ્તવમાં કાળા રંગનો પત્થર રસોડામાં નકારાત્મક ઊર્જા લાવે છે. આ પ્રકારના દોષ માટે પત્થર તોડયા વિના ત્યાં તમે સ્વસ્તિક બનાવી દો. માન્યતા અનુસાર તેનાથી વાસ્તુદોષની ખરાબ અસર ઓછી થઇ શકે છે.

(નોંધ: અહીં આપવામાં આવેલી જાણકારી ધાર્મિક આસ્થાઓ અને લોક માન્યતાઓ પર આધારિત છે, જેનો કોઈ વૈજ્ઞાનિક આધાર નથી. સામાન્ય જનરૂચિને ધ્યાનમાં રાખીને આ લેખને અહીં પ્રસ્તુત કરવામાં આવ્યો છે.)