બોટાદ વર્ષ 2012માં જિલ્લો બન્યો હતો. ચાર તાલુકાથી બનેલા આ જિલ્લાનું મુખ્ય મથક બોટાદ છે. જિલ્લો બન્યાને 10થી વધુ વર્ષ થવા છતાં બોટાદમાં લોકોને વિવિધ સમાસ્યાઓનો સામનો કરવો પડી રહ્યો છે. બોટાદ શહેરના રસ્તાઓ બિસ્માર હાલતમાં છે. ભાંભણ રોડ છેલ્લા 2 વર્ષથી બિસ્માર છે. સ્થાનિકોએ અનેકવાર રજૂઆત કરવા છતાં તંત્ર દરકાર લેતું નથી.
આ ભાંભણ રોડ ભાંભણ, જનડા, પીપળીયા, ઈંગોરલા જેવા આશરે 8થી 10 ગામોને જોડતો મુખ્યમાર્ગ છે. માત્ર આટલું જ નહીં પરંતુ ભાંભણ રોડ પર હિફ્લી નામનો વિસ્તાર આવેલો છે. આ વિસ્તારમાં 500થી વધુ હીરાના કારખાના આવેલા છે. અહીંથી રોજ હીરાના વેપારીઓ, કારખાનેદારો અને રત્નકલાકારો પસાર થાય છે. તકલીફ વેઠે છે, પરંતુ કઈ કરી શક્તા નથી.
અનેક વાહનચાલકો ખરાબ રસ્તાને પગલે અકસ્માતનો ભોગ બને છે. ગટરનું પાણી ઉભરાયા બાદ તો સ્થિતિ વધુ કફોડી બને છે અને ચોમાસામાં પસાર થવું મુશ્કેલ બની જાય છે. પરંતુ સત્તાધીશોને કોઈ ફરક પડતો નથી. છેલ્લા 2 વર્ષથી લોકો હાલાકી ભોગવી રહ્યા છે.