Breaking News : માનહાનિ કેસમાં રાહુલ ગાંધીની બે વર્ષની સજા રહેશે યથાવત
રાહુલ ગાંધીએ તેમનું કન્વિક્શન રદ કરવાની અપીલ કરતી અરજી દાખલ કરી હતી. જેના પર ગત સપ્તાહે સુનાવણી હાથ ધરવામાં આવી હતી. આ દરમ્યાન બંને પક્ષોએ લગભગ 5 કલાક સુધી દલીલો કરી હતી. જે બાદ કોર્ટે તેમનો ચુકાદો અનામત રાખ્યો હતો. ત્યારે હવે આજે સેશન્સ કોર્ટ ચુકાદો સંભળાવ્યો છે.
રાહુલ ગાંધીને માનહાનિ કેસમાં ઝટકો મળ્યો છે. કોંગ્રેસના નેતા રાહુલ ગાંધી સામે ચાલી રહેલા માનહાનિ કેસમાં સુરતની સેશન્સ કોર્ટ ચુકાદો સંભળાવ્યો છે. નામદાર જજ રોબિન મોઘેરા દ્વારા રાહુલ ગાંધીની બે વર્ષની સજા યથાવત રાખવામાં આવી છે. રાહુલ ગાંધીનું સભ્યપદ રદ થયાનું પણ યથાવત રહેશે. ત્યારે હવે રાહુલ ગાંધી દ્વારા હાઇકોર્ટમાં અપીલ કરવામાં આવશે. રાહુલ ગાંધીએ તેમનું કન્વિક્શન રદ કરવાની અપીલ કરતી અરજી દાખલ કરી હતી. જેના પર ગત સપ્તાહે સુનાવણી હાથ ધરવામાં આવી હતી. આ દરમ્યાન બંને પક્ષોએ લગભગ 5 કલાક સુધી દલીલો કરી હતી. જે બાદ કોર્ટે તેમનો ચુકાદો અનામત રાખ્યો હતો. ત્યારે હવે આજે સેશન્સ કોર્ટ રાહુલ ગાંધીની બે વર્ષની સજા યથાવત રાખી છે.
બંને પક્ષ તરફથી શું દલીલો થઇ હતી ?
ગત સુનાવણીમાં રાહુલ ગાંધીના વકીલ આર.એસ.ચીમાએ સજા રદ કરવાની અપીલ સાથે દલીલો કરી હતી. તેમણે કોર્ટ સમક્ષ જણાવ્યું હતુ કે રાહુલ ગાંધીનું ભાષણ અપમાનજનક ન હતું અને તેને સંદર્ભ વગર જોવામાં આવ્યું હતું. તેમણે દાવો કર્યો કે રાહુલ ગાંધી વડાપ્રધાન મોદી વિરુદ્ધ નીડરતાપૂર્વક બોલતા રહે છે જેના કારણે આ કેસ ચલાવવામાં આવ્યો છે.
રાહુલ ગાંધીના વકીલે ન્યાય અધિકાર ક્ષેત્ર પર પણ સવાલો ઉઠાવ્યા હતા. તેમણે કહ્યું હતું કે રાહુલ ગાંધીએ કર્ણાટકના કોલારમાં ભાષણ આપ્યું હતું અને ફરિયાદી કે જેઓ સુરતમાં રહે છે તેમને વોટ્સએપ થકી મેસેજ મળ્યો હતો. જેથી ન્યાય અધિકારક્ષેત્ર પર પણ પ્રશ્નો સર્જાય છે. તેમણે ટ્રાયલ કોર્ટના ચુકાદા અંગે કહ્યું કે કોર્ટ દ્વારા રાહુલને દોષી ઠેરવ્યા બાદ અડધા જ કલાકમાં મહત્તમ અને કઠોર સજા સંભળાવી દેવામાં આવી હતી. મને વિશ્વાસ છે કે કોર્ટ બરાબર જાણતી હતી કે જો તેમને એક દિવસ પણ ઓછી સજા કરવામાં આવશે તો તેઓ સાંસદપદેથી સસ્પેન્ડ થશે નહીં.
શું છે સમગ્ર કેસ ?
વર્ષ 2019માં લોકસભાની ચૂંટણીના પ્રચાર દરમિયાન કર્ણાટકના કોલાર ખાતે તત્કાલીન કોંગ્રેસના રાષ્ટ્રીય અધ્યક્ષ રાહુલ ગાંધીએ દેશના આર્થિક ગુનેગારો લલિત મોદી, નીરવ મોદી વગેરે સાથે વડાપ્રધાન નરેન્દ્ર મોદીની તુલના કરી હતી. વધુમાં બધા મોદી ચોર કેમ હોય છે? એવો સવાલ કરીને ચૂંટણી પ્રચારમાં જાહેર સભામાં મોદી સમાજની માનહાની કરી હતી.
જે અંગે સુરત શહેર પશ્ચિમના ધારાસભ્ય તથા મોઢવણિક સમાજના અગ્રણી ફરિયાદી પુર્ણેશ મોદીએ રાહુલ ગાંધી વિરુદ્ધ સુરત ચીફ જ્યુડીશ્યલ મેજીસ્ટ્રેટ કોર્ટમાં માનહાનીનો કેસ કર્યો હતો. જેની ગઈ તારીખ 23 માર્ચના રોજ સુનાવણી બાદ ચીફ જ્યુડિશિયલ મેજિસ્ટ્રેટ હરીશ વર્માએ આરોપી રાહુલ ગાંધીને માનહાનિના કેસમાં દોષી ઠેરવી મહત્તમ બે વર્ષની કેદની સજા ફટકારી હતી. જેના કારણે રાહુલ ગાંધીનું સંસદ સભ્ય પદ પણ ગયું હતું. આથી સુરત સીજીએમ કોર્ટના સજાના હુકમની કાયદેસરતાને સેશન્સ કોર્ટમાં પડકારતી અપીલ તથા બે વર્ષની કેદની સજાના હુકમને સ્થગિત કરવા અરજી કરી હતી.
ગુજરાતના તમામ સમાચાર અને બ્રેકિંગ ન્યૂઝ ગુજરાતીમાં વાંચો tv9gujarati.com પર
ગુજરાતના તમામ જિલ્લાના સમાચાર વાંચવા માટે જોડાયેલા રહો…
Published On - 11:08 am, Thu, 20 April 23