ગુજરાત પર તાઉ તે વાવાઝોડાનું સંકટ ઘેરાયુ છે. સુરતના સુવાલીના દરિયામાં કરંટ જોવા મળી રહ્યો છે. સુરતની આસપાસ આવેલા વિસ્તારોમાં પણ ચક્રવાતની અસર જોવાઈ રહી છે. ગ્રામ્ય વિસ્તારોમાં વરસાદી માહોલ છવાયો છે. NDRFની એક એક ટીમ સુવાલી અને ઓલપાડમાં તૈનાત કરાઈ છે. તંત્ર તરફથી લોકોને જાગૃત કરાઈ રહ્યા છે. માછીમારો દરિયામાં ન જાય તે માટે તકેદારી રખાઈ છે.
તાઉ તે વાવાઝોડું જેમ જેમ ગુજરાતની નજીક આવી રહ્યું છે, તેમ તેમ રાજ્યના વાતાવરણમાં પલટો આવ્યો છે. સુરતના ડુમસ દરિયા કિનારે ભારે પવન સાથે વરસાદ શરૂ થયો છે. પવનના કારણે દરિયામાં કરન્ટ જોવા મળી રહ્યો છે. સાથે જ વાવાઝોડાના પગલે દરિયામાં ઉંચા મોજા ઉછળી રહ્યાં છે. વાવાઝોડાની ગંભીરતા જોતા વહીવટી તંત્ર દ્વારા સહેલાણીઓ માટે ડુમસ બીચ બંધ રાખવામાં આવ્યો છે. સાથે જ લોકોને દરિયા કિનારે ન જવા સૂચન કર્યું છે.
સુરતના દરિયાકિનારના ગામોમાં NDRFની ટીમોની તૈનાતી કરવામાં આવી છે. આ ટીમ આધુનિક સાધન સામગ્રીઓથી સજ્જ છે. દરિયા કિનારાના નજીક રહેતા લોકોને વાવાઝોડા અંગેની માહિતી આપવામાં આવી છે.