ગુજરાત વિધાનસભાના અધ્યક્ષ શંકર ચૌધરીએ, વાવ બેઠકની પેટા ચૂંટણી માટે પ્રચાર કર્યો હતો. શંકર ચૌધરીએ બનાસકાંઠાની ધરતીને નર્મદાનું પાણી પહોચાડવાનુ કામ ગુજરાતના તત્કાલિન મુખ્ય પ્રધાન નરેન્દ્ર મોદીએ કર્યું હોવાનું યાદ દેવડાવ્યું હતું. આ પ્રસંગે મુખ્ય પ્રધાન ભૂપેન્દ્ર પટેલ ઉપરાંત બનાસકાંઠા ભાજપના અગ્રણીઓ સાથે ગુજરાત વિધાનસભાના અધ્યક્ષ શંકર ચૌધરી એક મંચ ઉપર બેઠા હતા.
ગુજરાત કોંગ્રેસના અધ્યક્ષ શક્તિસિંહે, શંકર ચૌધરીને ગુજરાત વિધાનસભાના અધ્યક્ષ પદની ગરિમા યાદ અપાવતા કહ્યું કે, અધ્યક્ષની ખુરશી પર જે બેસે છે તેમણે રાજકીય પક્ષના પ્રાથમિક સભ્યપદેથી રાજીનામુ આપવાનું હોય છે. અધ્યક્ષ ક્યારેય રાજકારણમાં રસ દાખવતા નથી. અત્યારના અધ્યક્ષને હુ વિનંતી કરીશ કે મહેરબાની કરજો, આ પરંપરાને ડાઘ લાગે તેવુ કામ આપ ના કરતા, આ ગુજરાતની પરંપરા રહી છે.
સાથોસાથ મુખ્ય પ્રધાન ભૂપેન્દ્ર પટેલને ગુજરાત વિધાનસભાના અધ્યક્ષના પદની ગરિમા જાળવવાની અપિલ કરતા કહ્યું કે, આ પદની ગરિમા જાળવવાની પહેલ કરે. ગુજરાતના મુખ્ય પ્રધાનને વિનંતી કરીશ, કે તમારી ફરજ છે કે સ્પીકરના પદને ડાઘ ના લાગવા દેવો, તમારે અધ્યક્ષને ના પાડવી જોઈએ કે, રાજકીય બેઠકોમાં મારા અધ્યક્ષને લઈ જઈને હુ મારા અધ્યક્ષ ને કલંકિત નહી કરુ, એ કહેવાની જવાબદારી મુખ્યપ્રધાનની છે.