Ahmedabad : અદાણી ગેસ બાદ હવે ગુજરાત ગેસે પણ CNGના ભાવમાં વધારો ઝીંક્યો છે. ગુજરાત ગેસે CNGના ભાવમાં 2 રૂપિયાનો તોતિંગ ભાવ વધારો ઝીંક્યો છે. જેના કારણે અત્યાર સુધી 52.45 રૂપિયે કિલો વેચાતો ગેસ હવે 54.45 રૂપિયે મળી રહ્યો છે.
એકતરફ પેટ્રોલ ડીઝલના ભાવ સાતમા આસમાને પહોંચ્યા તો બીજી તરફ CNG ગેસના ભાવમાં પણ વધારો ઝીંકાવા લાગ્યો છે. અદાણી ગેસ દ્વારા ગત 8 જુલાઈએ CNGમાં 68 પૈસાનો અને પીએનજીમાં એમએમબીટીયુ દીઠ 11.43નો વધારો ઝીંક્યા બાદ હવે ગુજરાત ગેસે પણ CNGમાં કિલો દીઠ 2 રૂપિયાનો વધારો કરતા CNG સંચાલિત વાહનચાલકો પર વધારાનો બોજ આવ્યો છે.
રાજ્ય સંચાલિત સિટી ગેસ ડિસ્ટ્રીબ્યુશન (CGD) કંપની ગુજરાત ગેસ લિમિટેડ (GGL) એ ગુજરાતની અંદર અને બહાર તેના અધિકૃત ભૌગોલિક વિસ્તારોમાં કોમ્પ્રેસ્ડ નેચરલ ગેસ (CNG) ના ભાવમાં વધારો કર્યો છે.
જીજીએલએ મોરબી અને સુરેન્દ્રનગરમાં સિરામિક અને સેનેટરીવેર એકમોને પૂરા પાડવામાં આવતા ઔદ્યોગિક પીએનજી (પાઇપ્ડ નેચરલ ગેસ) ના ભાવમાં પણ વધારો કર્યો છે. જો કે, કંપનીએ તેના રહેણાંક ગ્રાહકોને પૂરા પાડવામાં આવતા કુદરતી ગેસની કિંમત યથાવત રાખી છે.
જીજીએલ વેબસાઇટ અનુસાર, ગુજરાતમાં સીએનજીની કિંમત વધારીને 54.45 રૂપિયા પ્રતિ કિલો (કર અને ડ્યુટી સહિત) કરવામાં આવી છે, જે તેના અગાઉના રૂ. 52.45/કિલોના ટેરિફ કરતા 2 રૂપિયા પ્રતિ કિલોનો વધારો દર્શાવે છે. નવી કિંમત 24 ઓગસ્ટથી લાગુ થશે.
“GGL એ છેલ્લા દોઢ વર્ષથી CNG ના ભાવમાં વધારો કર્યો ન હતો. આ સાથે ઓપરેશનલ કોસ્ટમાં વધારો કંપનીને સીએનજીના ભાવમાં વધારો કરવા તરફ દોરી ગયો, ”જાણકાર લોકોએ જણાવ્યું હતું.
કંપની ગુજરાતમાં તેના લગભગ 450 CNG સ્ટેશનોના નેટવર્ક દ્વારા લગભગ 7 લાખ CNG ગ્રાહકોને સેવા આપે છે. દરમિયાન, GGL એ મોરબી અને સુરેન્દ્રનગરમાં સિરામિક અને સેનિટરીવેર એકમો માટે PNG ઔદ્યોગિક પીએનજીની કિંમતો 37.51 પ્રતિ સ્ટાન્ડર્ડ ક્યુબિક મીટર (SCM) કરી દીધી છે.
બજારના સૂત્રોએ જણાવ્યું હતું કે ઔદ્યોગિક પીએનજીના ભાવમાં વધારો મુખ્યત્વે આંતરરાષ્ટ્રીય બજારમાં પ્રવાહી કુદરતી ગેસ (એલએનજી) ના ભાવમાં ભારે ઉછાળાને કારણે થયો છે. ગુજરાત ગેસ મોરબી અને સુરેન્દ્રનગરમાં સિરામિક અને સેનિટરીવેર એકમોને 6.5 મિલિયન મેટ્રિક સ્ટાન્ડર્ડ ક્યુબિક મીટર પ્રતિ દિવસ (mmscmd) પૂરું પાડે છે.