સુરતમાં ગિલોલની મદદથી કારના કાચ તોડી કારમાં રહેલી કિંમતી ચીજવસ્તુઓની ઉઠાંતરી કરનાર આંધ્ર પ્રદેશની નેલ્લોર ગેંગ ઝડપાઇ છે. સુરત ક્રાઇમ બ્રાંચની ટીમે અડાજણ રામજી ઓવારા પાસેથી નેલ્લોર ગેંગના 5 આરોપીઓની ધરપકડ કરી છે. આ પાંચેય લોકો ગુજરાતના જાહેર અને ધાર્મિક સ્થળોએ ફરી લોકોની ગાડીઓને ટાર્ગેટ કરતા હતા. જેમાં ગાડીના બોનેટના નીચેનો ભાગ હોય ત્યાં ઓઈલ ટપકે છે તેમ કહીં લોકોનું ધ્યાન ભટકાવી પાછળથી સમાન ચોરી કરતા હતા.
પોલીસે તેમની પાસેથી ઓઈલ ભરેલી બોટલ, હેરપીન, રબર બેન્ડ, ચોકલેટ રેપર વડે બનાવેલા ગિલોલ, સ્ટીલના નાના છરા સહિતની વસ્તુઓ કબજે કરી છે. આ સાથે જ સુરતના ઉમરા પોલીસ મથકમાં નોંધાયેલા બે ગુના, વરાછા, ખટોદરા, ઉધના, સરથાણા અને મહીસાગર લુણાવડા પોલીસ મથકમાં નોંધાયેલા 7 ગુના મળી તેમજ આરોપીઓએ કબુલાત કરેલા 14 મળી કુલ 21 ગુનાનો ભેદ ઉકેલાઈ ગયો છે.