પાણીની પરબ અત્યાર સુધી તમે જોઈ હશે. પરંતુ મહેસાણાના તરભમાં ગરમા ગરમ ચાની પરબ જેવી વ્યવસ્થા કરવામાં આવી છે. આ વિશેષ વ્યવસ્થા દ્વારા શ્રદ્ધાળુઓને માટે ગોઠવવામાં આવી છે. અહીં એક સાથે 3000 થી 3500 લોકો ચા પી શકે એ માટેની વ્યવસ્થા કરવામાં આવી છે. અહીં પ્રતિદિવસ દોઢ લાખ લોકો ચા પી રહ્યા છે.
અહીં દૂધની સરસ ચાની વ્યવસ્થાનો લાભ પણ ભક્તો ખુશી ખુશી લઈ રહ્યા છે. ખાસ કરીને દેસાઈ-રબારી સમાજનો પ્રસંગ કે મહોત્સવ હોય અને ચા વિના જાણે કે અધૂરો હોય એમ કહેવાય. આમ લાખો લોકો પધારનારા હોય તો તેમને માટે ચા ગરમા ગરમ પીરસવી એ પડકાર સમાન છે. એમ છતાં સુંદર રીતે આ વ્યવસ્થાને ઉભી કરીને લોકોને ચા પીરસવામાં આવી રહી છે.
અહીં દરરોજ દર્શને આવતા લાખો શ્રદ્ધાળુઓને ચા પીરસવા માટે જેમ પાણીની પરબમાં નળ લાગેલા હોય એમ જ અહીં ચા માટે નળ લગાવ્યા છે. પાણીના નળની જેમ જ અહીં ચકલી ખોલતા જ ચા નિકળવા લાગે છે. ગરમા ગરમ ચા એક સાથે 3500 જેટલા લોકોને પીરસી શકાય એવી વ્યવસ્થા ઉભી કરવામાં આવી છે.
દૈનિક સાડા ત્રણ હજાર લીટર દૂધમાંથી આ ચા બનાવવામાં આવે છે. જે તૈયાર ચા એક ટાંકીમાં ભરવામાં આવે છે. જે ટાંકીમાંથી ચા પાઈપ મારફતે નળ સુધી પહોંચે છે. જ્યાં નળ ખોલતા જ ગરમા ગરમ ચા કપમાં ભરાઈ જાય છે. આ માટે શ્રદ્ધાળુઓએ જાતે જ ચાને પોતાના કપમાં ભરીને તેનો લ્હાવો માણવાનો હોય છે. આમ ચા માટે વિશેષ પ્રકારની વ્યવસ્થા ઉભી કરવામાં આવી છે.
Published On - 1:43 pm, Wed, 21 February 24