રાજકોટમાં (Rajkot) કટકીબાજ ટ્રાફિક વોર્ડનની (Traffic Warden) ફરજ દરમિયાન ગેરકાયદેસર પ્રવૃત્તિ આચરવા બદલ હકાલપટ્ટી કરવામાં આવી છે. શહેરના અટિકા ફાટક નજીક વોર્ડનનો વાહનચાલક પાસેથી રૂપિયા ઉઘરાવતો વીડિયો વાયરલ થયો હતો. જેમાં ટ્રાફિક જવાને (Traffic police) કોઈપણ જાતની પહોંચ આપ્યા વગર વાહનચાલક પાસેથી પૈસા લીધા હતા. જે બદલ ટ્રાફિક SPએ તાત્કાલિક અસરથી એક્શન લઇ ગેરવર્તુણક બદલ તેને બરતરફ કરવામાં આવ્યો હતો.ટ્રાફિક SP એ જણાવ્યું કે, આ પ્રકારની આ ગેરવર્તણુંક ચલાવી શકાય નહિ.
સામાન્ય રીતે ટ્રાફિક વ્યવસ્થા યોગ્ય બને અને વાહનચાલકોને મુશ્કેલી ન પડે તે માટે રાજકોટ શહેર પોલીસ (Rajkot police) દ્વારા ટ્રાફિક વિભાગમાં ટ્રાફિક વોર્ડનની ભરતી કરવામાં આવતી હોય છે. આ ટ્રાફિક વોર્ડનની મુખ્ય જવાબદારી ટ્રાફિક નિયમોનું પાલન કરાવવાનું અને ટ્રાફિક વ્યવસ્થા જળવાઈ રહે તે હોય છે પરંતુ કેટલાક લેભાગુ વૃત્તિ ધરાવતા વોર્ડનના કારણે તમામ વોર્ડનની બદનામી મળતી હોય છે.રાજકોટમાં જ કંઈક આવી જ ઘટનાનો વીડિયો વાયરલ (Video viral) થયો હતો. જેમાં ટ્રાફિક વોર્ડન પહોંચ આપ્યા વગર પૈસા ઉઘરાવતો જોવા મળી રહ્યો છે.