VADODARA : નિઝામપુરામાં લવ જેહાદની ચોંકાવનારી ઘટના, હિંદુ યુવતીએ મુસ્લિમ પતિ સામે નોંધાવી ફરિયાદ

VADODARA : નિઝામપુરામાં લવ-જેહાદની ચોંકાવનારી ઘટના સામે આવી છે. આ ઘટના એવા સમયે બહાર આવી છે જ્યારે રાજ્યમાં લવ-જેહાદના કાયદાની ચર્ચાએ જોર પકડેલું છે. નિઝામપુરામાં હિન્દુ યુવતી સાથે પ્રેમલગ્ન કરનાર મુસ્લિમ યુવકે લગ્નના એક વર્ષ બાદ તેણીને ધર્માંતરણ કરવા દબાણ કરી મારઝૂડ કરી હોવાનો આક્ષેપ છે. યુવતીએ હિંમત દાખવીને ફતેહગંજ પોલીસ મથકે પતિ વિરૂદ્ધ ફરિયાદ નોંધાવી છે.

નિઝામપુરા વિસ્તારમાં રહેતી હિન્દુ યુવતીએ ફરિયાદમાં જણાવ્યું હતું કે નિઝામપુરામાં કુંભારવાડા ખાતે રહેતા યુવક સાથે તેનો પરિચય થયો હતો. પ્રેમ સંબંધ બંધાતા તેણીએ તેના માતા-પિતાની મરજી વિરુદ્ધ વર્ષ 2018ના જુલાઈ મહિનામાં સ્પેશિયલ મેરેજ એક્ટ મુજબ રજીસ્ટર લગ્ન કર્યા હતા. ત્યારબાદ વર્ષ 2019ના જૂન મહિનામાં તે અને ટુંડાવ ગામે રહેવા ગયા હતા. ત્યાં ચાર મહિના જેટલો સમય વિતાવી વડોદરામાં નિઝામપુરા કુંભારવાડામાં રહેવા આવ્યા હતા. ત્યારબાદ યુવકે તેનો અસલી રંગ બતાવ્યો હતો.. ફરિયાદમાં યુવતીએ આક્ષેપ કર્યો છે કે તેનો પતિ અવારનવાર મુસ્લિમ ધર્મ અંગીકાર કરવા દબાણ કરતો હતો. અને તે ના પાડતી ત્યારે તેની સાથે મારઝૂડ કરીને ત્રાસ ગુજારતો હતો. યુવતીની વાત માનીએ તો, તેનો પતિ તેના પિયર પક્ષના સભ્યોને મારી નાખવાની ધમકી આપતો હતો. વારંવારની ધમકીથી કંટાળીને યુવતી તેના માતા-પિતાના ઘરે રહેવા જતી રહી હતી. અને આખરે કંટાળીને પોલીસ મથકે ફરિયાદ નોંધાવી હતી.