Surat: સુરતની એલ.પી.સવાણી અને વ્હાઇટ લોટસ સ્કૂલની મનમાની, વાલીઓએ DEO કચેરી ખાતે વિરોધ પ્રદર્શન યોજી આક્રોશ દર્શાવ્યો

Surat: સુરતની પાલ ખાતે આવેલ એલ.પી.સવાણી અને વ્હાઇટ લોટસ સ્કૂલ દ્વારા RTE હેઠળ પ્રવેશ મેળવનાર 15 થી વધુ વિદ્યાર્થીઓને ઓનલાઈન એજ્યુકેશનથી (Online Education) વંચિત રાખવામાં આવતા, વાલીઓએ DEO કચેરી ખાતે વિરોધ પ્રદર્શન કરી આક્રોશ ઠાલવ્યો હતો.

કોરોના કાળમાં ફી ને લઈને ચર્ચામાં આવેલી સ્કૂલો વધુ એક વાર ચર્ચામાં આવી છે, સુરતની એલ.પી.સવાણી અને વ્હાઇટ લોટસ સ્કૂલ દ્વારા RTE અંતર્ગત એડમિશન મેળવનાર વિદ્યાર્થીઓને ઓનલાઈન એજ્યુકેશન ન આપતી હોવાની  ફરિયાદો સામે આવી છે.

ત્યારે , વાલીઓએ જિલ્લા શિક્ષણાધિકારી કચેરી બહાર વિરોધ દર્શાવી ન્યાયની માંગણી કરી છે, વાલીઓનું કહેવું છે કે, “એલ.પી.સવાણી અને વ્હાઇટ લોટસ સ્કૂલ RTE હેઠળ પ્રવેશ મેળવનાર વિદ્યાર્થીઓ સાથે ભેદભાવ કરી રહી છે.”

વાલીઓએ વધુમાં જણાવ્યું કે,  આ મામલે  શાળાનાં સંચાલકોને  અનેકવાર ફરિયાદ કરી છે પણ કોઈ ઉકેલ આવ્યો નથી.  ઉપરાંત શાળાનાં સંચાલકોનું કહેવું છે કે,  પેઈડ સર્વર(Paid server)  હોવાથી ઓનલાઈન એજ્યુકેશન નહિ આપવામાં આવે તેવો વાલીઓનો આરોપ છે.

RTE એક્ટ

સામાન્ય રીતે RTE એક્ટ, (Right to education)  2009 નો અમલ ભારતમાં 1 એપ્રિલ 2010થી થયો છે,  આ એક્ટ મુજબ ખાનગી શાળાઓમાં ગરીબ અને મધ્યમ વર્ગનાં બાળકોને મફતમાં શિક્ષણ (free education) આપવામાં આવશે, જેમાં 6 થી 14 વર્ષનાં બાળકોનો સમાવેશ થાય છે.

મહત્વપૂર્ણ છે કે, બાળકોનાં બંધારણીય અધિકાર પર ખાનગી સંચાલકો દ્વારા ત્રાપ મુકવામાં આવી રહી છે, આ અગાઉ પણ શહેરની અનેક સ્કુલોની મનમાની સામે આવી છે પરંતુ તંત્ર દ્વારા યોગ્ય કાર્યવાહી ન કરાતા આવી  પ્રવુતિઓને વેગ મળી રહ્યો છે.