પૂર્વ મુખ્યમંત્રી શંકરસિંહ વાઘેલાના અનામત અંગેના નિવેદનને લઈને શરૂ થયેલો વિવાદ વધુ વકર્યો છે. નિવેદનને લઈને તેમના પર માફી માગવાની માગ કરવામાં આવી રહી છે, જોકે શંકરસિંહ વાઘેલાએ સ્પષ્ટ શબ્દોમાં માફી માગવાનો ઇનકાર કર્યો છે. શંકરસિંહ વાઘેલાએ કહ્યું કે, “માફી માગવાનો કોઈ સવાલ જ નથી. જે બોલ્યો છું, એ ડંકાની ચોટ પર બોલ્યો છું.” તેમણે પોતાના નિવેદનનો બચાવ કરતા કહ્યું કે, તેમણે દલિત અને આદિવાસી સમાજના હકની વાત કરી છે અને તેઓ કોઈ પણ સમાજના વિરોધી નથી. શંકરસિંહ વાઘેલાએ આ સમગ્ર મામલે ભાજપ પર પણ પ્રહાર કર્યા હતા. તેમણે આક્ષેપ કર્યો કે, ભાજપ દ્વારા આ મુદ્દાને ખોટી રીતે ઉશ્કેરવાનો પ્રયાસ કરવામાં આવી રહ્યો છે. તેમણે સ્પષ્ટતા કરી કે તેમના નિવેદનનો હેતુ કોઈ સમાજનો વિરોધ કરવાનો નહોતો, પરંતુ દલિત અને આદિવાસી સમાજના હકો અંગે પોતાની વાત રજૂ કરવાની હતી. પૂર્વ મુખ્યમંત્રીએ વધુમાં કહ્યું કે, “મેં ક્યારેય નિવેદન આપ્યા બાદ માફી માગી નથી.” આમ, અનામત અંગેના નિવેદનને લઈને ચાલી રહેલા વિવાદ વચ્ચે શંકરસિંહ વાઘેલા પોતાના નિવેદન પર અડગ રહ્યા છે અને માફી માગવાનો સ્પષ્ટ ઇનકાર કર્યો છે.
