રાજસ્થાનના પ્રખ્યાત હિલ સ્ટેશન માઉન્ટ આબુમાં વરસાદી માહોલ વચ્ચે કુદરતનો અદભૂત નજારો જોવા મળી રહ્યો છે. ધીમીધારે વરસી રહેલા વરસાદ અને ગાઢ ધુમ્મસને કારણે સમગ્ર પર્વતીય વિસ્તાર હરિયાળીની ચાદરથી ઢંકાઈ ગયો છે. વરસાદી વાતાવરણ અને ઠંડા પવન વચ્ચે માઉન્ટ આબુનું સૌંદર્ય વધુ ખીલી ઊઠ્યું છે, જેના કારણે પર્યટકો મોટી સંખ્યામાં અહીં પહોંચી રહ્યા છે. માઉન્ટ આબુના નક્કી લેક, ગુરુ શિખર, સનસેટ પોઇન્ટ સહિતના પર્યટન સ્થળોએ પ્રવાસીઓની ભારે ભીડ જોવા મળી રહી છે. વરસાદની ઝરમર વચ્ચે લોકો કુદરતી સૌંદર્યનો આનંદ માણી રહ્યા છે તેમજ ફોટોગ્રાફી અને વીડિયો બનાવી વરસાદી માહોલને યાદગાર બનાવી રહ્યા છે. ધુમ્મસ અને હરિયાળીથી ઘેરાયેલા પહાડો પ્રવાસીઓને આકર્ષી રહ્યા છે. ગુજરાત સહિત રાજસ્થાનના વિવિધ શહેરોમાંથી પણ મોટી સંખ્યામાં પ્રવાસીઓ માઉન્ટ આબુ પહોંચ્યા છે. ખાસ કરીને સપ્તાહાંત અને રજાના દિવસોમાં પરિવાર અને મિત્રો સાથે લોકો વરસાદી મોસમની મજા માણવા માટે માઉન્ટ આબુની મુલાકાત લઈ રહ્યા છે. હોટેલ, રિસોર્ટ અને સ્થાનિક પ્રવાસન વ્યવસાયને પણ આ વરસાદી સીઝનથી સારો પ્રતિસાદ મળી રહ્યો છે. વરસાદને કારણે માઉન્ટ આબુમાં વાતાવરણ વધુ ઠંડું અને મનમોહક બન્યું છે. કુદરતી સૌંદર્ય, હરિયાળી અને ધીમીધારે વરસતા વરસાદ વચ્ચે માઉન્ટ આબુ હાલ પ્રવાસીઓ માટે આકર્ષણનું મુખ્ય કેન્દ્ર બન્યું છે. સ્થાનિક તંત્ર દ્વારા પ્રવાસીઓને વરસાદ દરમિયાન સાવચેતી રાખવા અને સુરક્ષિત સ્થળોએ જ મુલાકાત લેવાની સલાહ પણ આપવામાં આવી છે.
