ટોર્નેડો’ વાવાઝોડું આમ તો અમેરિકામાં ફૂંકાતું હોય છે, પરંતુ કુદરતનો અવિસ્મરણીય નજારો જોવા મળ્યો ગુજરાતમાં. જી હા, રાજ્યમાં વરસાદી માહોલ વચ્ચે જોવા મળ્યો છે કુદરતનો અલૌકિક નજારો.. વાત ગઇકાલ સાંજની.. જ્યાં રાજકોટ-અમદાવાદ હાઇવે પર સાયલા નજીક મિનિ ‘ટોર્નેડો’ જોવા મળ્યું. ‘ટોર્નેડો’ જેવા દ્રશ્યો સર્જાતા થોડીવાર માટે વાહનોના પૈડા થંભી ગયા. અમેરિકા જેવા દ્રશ્યો ગુજરાતમાં સર્જાતા નાગરિકોમાં પણ ભારે કુતુહલ જોવા મળ્યું.. દાવો છે કે મિનિ ‘ટોર્નેડો’ના કારણે ભારે વરસાદ અને મસમોટા કરા પડ્યા હતા. દ્રશ્યોમાં જોઇ શકાય છે તેમ, જાણે કે આકાશમાંથી વાદળોથી ગૂંથાયેલી દોરી જમીન પર ઉતરતી હોય તેવું લાગી રહ્યું છે.. મિનિ ‘ટોર્નેડો’ને પગલે હાઈવે પર આંધીનો માહોલ સર્જાયો હતો. પવનની તીવ્ર ગતિને પગલે ધૂળની ડમરીઓ ઉડી હતી. તો ડિવાઈડર પર લગાવવામાં આવેલા છોડ ઉખાડીને ફેંકાયા હતા. કુદરતનું આ રૌદ્ર સ્વરૂપ જોઈને આખા હાઈવે પરના વાહનો થંભી ગયા હતા. આ મિનિ ટોર્નેડો થોડીવાર પછી આગળ વધી પેટ્રોલ પંપ પાસે ભારે તારાજી સર્જી હતી.. સતત વીજળીના કડાકા, ભારે વરસાદ સાથે મસમોટાં કરાએ લોકોના જીવ તાળવે ચોંટાડી દીધા હતા.
