સુરતની વીર નર્મદ દક્ષિણ ગુજરાત યુનિવર્સિટી (VNSGU) ના કેમ્પસમાં આવેલા સમરસ બોયઝ હોસ્ટેલમાં મોડી રાત્રે હોબાળો થયો હતો. હોસ્ટેલમાં રહેતા લગભગ 500 જેટલા વિદ્યાર્થીઓ ભોજનની હલ્કી અને નબળી ગુણવત્તા અંગે વિરોધ દર્શાવવા માટે રસ્તા પર ઉતરી આવ્યા હતા. વિદ્યાર્થીઓએ આક્ષેપ કર્યો છે કે હોસ્ટેલમાં તેમને વારંવાર નબળી ગુણવત્તાનું ભોજન આપવામાં આવે છે અને વારંવાર રજૂઆત કરવા છતાં પણ આ સમસ્યાનો કોઈ ઉકેલ આવ્યો નથી. આના કારણે વિદ્યાર્થીઓમાં ભારે રોષ જોવા મળ્યો હતો, અને તેમણે સૂત્રોચ્ચાર કરીને પોતાનો વિરોધ નોંધાવ્યો હતો. વિદ્યાર્થીઓનો રોષ જોઈને હોસ્ટેલના વોર્ડન અને સમાજ કલ્યાણ અધિકારી ઘટનાસ્થળે દોડી આવ્યા હતા અને મામલો શાંત પાડવાનો પ્રયાસ કર્યો હતો. જોકે, વિદ્યાર્થીઓએ સ્પષ્ટ ચીમકી આપી છે કે જો આગામી 7 દિવસમાં તેમની ભોજન સમસ્યાનો કોઈ નક્કર ઉકેલ નહીં આવે, તો તેઓ ઉગ્ર આંદોલન શરૂ કરશે. આ ઘટનાથી યુનિવર્સિટી કેમ્પસમાં તંગદિલીનો માહોલ સર્જાયો હતો.
