અમદાવાદના નરેન્દ્ર મોદી સ્ટેડિયમમાં આજે રમાનારી IPL 2026ની ફાઈનલ મેચ પર વરસાદનું સંકટ મંડરાઈ રહ્યું છે. હવામાન વિભાગે અમદાવાદમાં સામાન્યથી મધ્યમ વરસાદની આગાહી વ્યક્ત કરી છે, જેના કારણે ક્રિકેટ ચાહકોમાં ચિંતા જોવા મળી રહી છે. સમગ્ર દિવસ દરમિયાન વાદળછાયું વાતાવરણ રહેવાની શક્યતા છે, જ્યારે સાંજના સમયે વરસાદી ઝાપટાં પડી શકે છે. હવામાન વિભાગના અનુમાન મુજબ અમદાવાદ અને આસપાસના વિસ્તારોમાં થન્ડરસ્ટોર્મ એક્ટિવિટી જોવા મળી શકે છે. વીજળીના કડાકા-ભડાકા સાથે તેજ પવન ફૂંકાવાની પણ શક્યતા છે. આવી સ્થિતિમાં મેચ દરમિયાન વરસાદ વિઘ્નરૂપ બની શકે છે અને રમતને અસર પહોંચાડી શકે છે. IPLની સૌથી મહત્વપૂર્ણ ગણાતી ફાઈનલ મેચ માટે લાખો ક્રિકેટપ્રેમીઓ આતુરતાથી રાહ જોઈ રહ્યા છે. જોકે હવામાનની અનિશ્ચિતતા વચ્ચે આયોજકો અને ચાહકો બંનેની નજર હવે આકાશ તરફ છે. જો વરસાદ વધુ પ્રમાણમાં વરસશે તો મેચના સમયપત્રકમાં ફેરફાર અથવા ઓવરોમાં ઘટાડો કરવો પડે તેવી સ્થિતિ સર્જાઈ શકે છે. અમદાવાદમાં છેલ્લા કેટલાક દિવસોથી પ્રિ-મોન્સૂન એક્ટિવિટી સક્રિય બની છે, જેના કારણે શહેર સહિત રાજ્યના અનેક વિસ્તારોમાં વરસાદી માહોલ જોવા મળી રહ્યો છે. હવામાન વિભાગે આગામી કલાકોમાં પણ વાદળછાયું વાતાવરણ અને છૂટાછવાયા વરસાદની શક્યતા વ્યક્ત કરી છે. આવી સ્થિતિમાં IPL ફાઈનલ દરમિયાન હવામાન સૌથી મોટો ફેક્ટર બની શકે છે.
