ગીર સોમનાથ જિલ્લામાં ઉનાથી ગીર ગઢડા તરફ જતા માર્ગ પર સિંહ પરિવારની અવરજવર જોવા મળી રહી છે. વડવીયાળા ગામ નજીક સિંહણ અને સિંહબાળ કેમેરામાં કેદ થતાં સમગ્ર વિસ્તારમાં ચકચાર મચી છે. સ્થાનિકોના જણાવ્યા મુજબ, રસ્તા પર તેમજ આસપાસની ઝાડીઓમાં સિંહ પરિવાર અવારનવાર જોવા મળી રહ્યો છે. જેના કારણે આ માર્ગ પરથી પસાર થતા વાહનચાલકો અને સ્થાનિક લોકોમાં ભયનો માહોલ જોવા મળી રહ્યો છે. મહત્વનું છે કે, આ વિસ્તારમાં લાંબા સમયથી સિંહ પરિવારના વસવાટની માહિતી સામે આવી રહી છે. સ્થાનિકોમાં ચર્ચા છે કે સિંહો આ વિસ્તારમાં સતત અવરજવર કરી રહ્યા છે અને આસપાસના વિસ્તારોમાં પણ તેમની હાજરી જોવા મળી રહી છે. આ ઉપરાંત અલગ-અલગ દિવસોમાં ચાર પશુઓના મારણની વિગતો પણ સામે આવી છે. જેના પગલે સિંહ પરિવારના વસવાટને લઈને સ્થાનિકોમાં ચિંતા વધુ વધી છે. હાલમાં સિંહણ અને સિંહબાળનો વીડિયો/દૃશ્યો કેમેરામાં કેદ થતાં ફરી એકવાર આ વિસ્તારમાં સિંહોની હાજરી ચર્ચામાં આવી છે. સ્થાનિકો દ્વારા સિંહોની અવરજવરવાળા વિસ્તારોમાં સાવચેતી રાખવાની માંગ સાથે વન વિભાગ દ્વારા યોગ્ય તકેદારી રાખવામાં આવે તેવી અપેક્ષા વ્યક્ત કરવામાં આવી રહી છે.
