અમદાવાદઃ કેન્દ્રીય ગૃહપ્રધાન અમિત શાહે ગુજરાતને રેલવે ક્ષેત્રે મોટી ભેટ આપી છે. અમદાવાદના સાબરમતીથી ભારતની પ્રથમ LNG સંચાલિત ટ્રેનને લીલીઝંડી આપવામાં આવી છે. આ ટ્રેન સાબરમતીથી પાટણ વચ્ચે દોડશે. LNG આધારિત આ ટ્રેનની શરૂઆતને ભારતીય રેલવે ક્ષેત્રે મહત્વપૂર્ણ પહેલ તરીકે જોવામાં આવી રહી છે. આ સાથે અમિત શાહે ગુજરાતમાં ₹1,542 કરોડથી વધુની રેલવે પરિયોજનાઓનો પ્રારંભ અને લોકાર્પણ કરાવ્યું હતું. સાબરમતી ખાતે ₹700 કરોડના ખર્ચે તૈયાર કરવામાં આવેલા WAG-12 લોકોમોટિવ મેન્ટેનન્સ શેડનું પણ લોકાર્પણ કરવામાં આવ્યું. આ મેન્ટેનન્સ શેડમાં આધુનિક સુવિધાઓ સાથે WAG-12 શ્રેણીના શક્તિશાળી ઇલેક્ટ્રિક લોકોમોટિવની જાળવણી કરવામાં આવશે. કાર્યક્રમ દરમિયાન સાબરમતી-સરખેજ રેલવે લાઇનના ડબલિંગ કામનો પણ શિલાન્યાસ કરવામાં આવ્યો હતો. રેલવેના માળખાકીય વિકાસ સાથે LNG સંચાલિત ટ્રેનની શરૂઆતથી ગુજરાતમાં પરિવહન ક્ષેત્રે નવી પહેલને વેગ મળવાની અપેક્ષા છે.
