Video: રાજકોટમાં સિવિલ હોસ્પિટલની નર્સને થયો વરવો અનુભવ, ઘરે જઈ રહી હતી ત્યારે કોઈ શખ્સે ખેંચી અને ઢસડીને લઈ જવાનો કર્યો પ્રયાસ
Rajkot: મહિલાઓની સલામતી સામે ફરી એકવાર સવાલ ઉઠ્યા છે. સિવિલ હોસ્પિટલમાં ફરજ બજાવતી નર્સને રાત્રે 8 વાગ્યે ઘરે જતા સમયે વરવો અનુભવ થયો હતો. પાછળથી અજાણ્યા શખ્સે ખેંચી તેને ઢસડીની લઈ જવાનો પ્રયાસ કર્યો હતો. મહિલાએ ઘટના અંગે બે દિવસથી અરજી આપ્યા બાદ પણ આરોપી હજુ સુધી પકડાયો નથી.
ગુજરાતમાં મહિલા સલામતીના મોટા મોટા દાવા તો થાય છે પરંતુ સૌરાષ્ટ્રના પાટનગર રાજકોટમાં નર્સ સાથે જે ઘટના બની છે તેના પરથી મહિલા સલામતીના આ દાવાની પોલ ખૂલી ગઈ છે. રાજકોટમાં માધાપર ચોકડી પાસે રહેલી મહિલા સિવિલ હોસ્પિટલમાં નર્સ તરીકેની ફરજ બજાવે છે. આ યુવતી શુક્રવારે રાત્રે જ્યારે સિવિલમાં તેની ડ્યુટી પતાવી રાત્રે 8 વાગ્યે ઘરે જઈ રહી હતી ત્યારે તેમના એપાર્ટમેન્ટ તરફ જવાના રસ્તે યુવતીને પાછળથી અજાણ્યા એક શખ્સે તેની પર હુમલો કર્યો.
શખ્સે યુવતીના વાળ ખેંચી પકડવાનો કર્યો પ્રયાસ
યુવતી ચાલીને જઈ રહી હતી ત્યારે પાછળથી 30થી 35 વર્ષના શખ્સે તેને પાછળથી પકડીને દૂર સુધી ઢસડી હતી. વાળ ખેંચીને તેને ક્યાંય સુધી ઘસડી હતી. જો કે મહિલાએ પણ આ શખ્સ સાથે ઝપાઝપી કરી કોઈપણ રીતે તેની પકડમાંથી છૂટી ગઈ હતી. નર્સે હિંમત કરી બદઈરાદો રાખનાર શખ્સના સકંજામાંથી પોતાની જાતને તો છોડાવી જેમતેમ કરી એપાર્ટમેન્ટ પહોંચી હતી અને એપાર્ટમેન્ટના રહિશોને પોતાની આપવિતી વર્ણવી હતી.
લોકો યુવતીના જણાવ્યા મુજબ ઘટનાસ્થળે પહોંચ્યા પરંતુ ત્યાં સુધીમાં તો નરાધમ શખ્સ ત્યાંથી ફરાર થઈ ગયો હતો. આ ઘટના અંગે યુવતીએ બે દિવસથી ગાંધીગ્રામ પોલીસ સ્ટેશનમાં અરજી આપી છે અને આરોપી શખ્સને પકડી દાખલારૂપ કાર્યવાહી કરવાની માગ કરી છે પરંતુ ગાંધીગ્રામ પોલીસ હજુ સુધી આરોપીને પકડી શકી નથી.
બે દિવસ બાદ પણ આરોપી ખુલ્લેઆમ ફરી રહ્યો છે ત્યારે એ સવાલ એ પણ છે કે જ્યા સુધી આરોપી પકડાય નહીં ત્યા સુધી પીડિત નર્સ પણ પોતાની જાતને સલામત અનુભવી શક્તી નથી. જ્યારે અન્ય યુવતીઓની સલામતી સામે પણ જોખમ તોળાઈ રહ્યુ છે આવા નરાધમો ખુલ્લા ફરતા રહે ત્યાં સુધી મહિલાઓ સલામત કેવી રીતે રહી શકે?
