Anand: સતત ત્રીજા દિવસે બોરસદના ગામો પાણીમાં ડુબેલા છે, 15 મકાન હજુ પણ પાણીમાં ગરકાવ
આણંદના (Anand) બોરસદમાં કેટલાક વિસ્તારોમાં સતત ત્રીજા દિવસે પણ પાણી ભરાયેલા છે. પાણી ઓસર્યા બાદ છેક હવે જિલ્લા અને તાલુકાના પદાધિકારીઓ સક્રિય થયા છે.
આણંદ (Anand) જિલ્લાના બોરસદ તાલુકામાં ખાબકેલા 12 ઇંચ જેટલા ભારે વરસાદ (Rain) બાદ જન જીવન અસ્ત વ્યસ્ત થઇ ગયુ છે. બોરસદ (Borsad) તાલુકાનુ સીસ્વા ગામ હાલ બેટમાં ફેરવાયુ છે. કેટલાક વિસ્તારમાં તો પાણી ઓસરી ગયા છે. જો કે સતત ત્રીજા દિવસે આજે પણ કેટલાક વિસ્તારોમાં પાણીમાં ગરકાવ છે. ત્યારે તંત્ર દ્વારા આ વિસ્તારોની મુલાકાત લેવામાં આવી રહી છે. સાથે જ રોગચાળો ન ફાટી નીકળે તે માટે દવાના છંટકાવ સહિતની કામગીરી હાથ ધરવામાં આવી છે.
15 મકાનો હજુ પાણીમાં ગરકાવ
આણંદના બોરસદ તાલુકાના સીસ્વામાં ભારે વરસાદ બાદ 15 મકાનો હજુ પાણીમાં ગરકાવ છે. સીસ્વામાં રોગચાળો ન વકરે તે માટે વહીવટી તંત્રની ટીમે ગામમાં દવાનો છંટકાવ શરૂ કર્યો છે. તો આરોગ્ય તંત્રની ટીમે લોકોના આરોગ્યની ચકાસણી હાથ ધરી છે. સીસ્વા ગામમાં ભારે વરસાદથી થયેલી નુકસાનીનો સર્વે કરવા જિલ્લા પંચાયત અને અન્ય ટીમ પહોંચી છે. તો બીજી તરફ અસરગ્રસ્ત લોકોને જરૂરી સહાયનું પણ વિતરણ કરવામાં આવ્યું.
સતત ત્રીજા દિવસે પણ પાણી ભરાયેલા
બોરસદના સીસ્વા ગામે ધીમે ધીમે પાણી હવે ઓસરવા લાગ્યા છે. પરંતુ કેટલાક વિસ્તારોમાં સતત ત્રીજા દિવસે પણ પાણી ભરાયેલા છે. પાણી ઓસર્યા બાદ છેક હવે જિલ્લા અને તાલુકાના પદાધિકારીઓ સક્રિય થયા છે. જે વિસ્તારોમાં પાણી ઓસર્યા છે તે વિસ્તારોમાં નુક્સાનના સર્વેની કામગીરી હાથ ધરવામાં આવી છે. સીસ્વા ગામે આવેલા પૂરના કારણે અત્યાર સુધીમાં 3 લોકો અને 94 પશુઓના મોત થઈ ચૂક્યા છે.
પદાધિકારીઓએ કરી સ્થળ મુલાકાત
નીચાણવાળા વિસ્તારમાં રહેતા 380 લોકો હજુ પણ જુદા-જુદા સ્થળે રખાયા છે. કેટલાક લોકોને પટેલ વાડીમાં રાખવામાં આવ્યા છે. તેમની સ્થિતિ જાણવા માટે જિલ્લા પંચાયતના પ્રમુખ અને તાલુકા પંચાયતના ઉપપ્રમુખ સહિતના પદાધિકારીઓ પટેલ વાડી પહોંચ્યા હતા. જિલ્લા પંચાયતના પ્રમુખે કહ્યું કે જે નુક્સાન થયું છે તે સરકાર આપશે. જ્યારે તાલુકાના ઉપપ્રમુખે કહ્યું કે ભવિષ્યમાં આ પ્રકારની સ્થિતિ ન સર્જાય તે માટે કાંસ સાફ કરાવી દેવામાં આવશે.
