દ્વારકાના જામખંભાળિયામાં 7 ઇંચથી વધુ વરસાદ, કલ્યાણપુરનો શેઢાભાડથરી ડેમ ઓવરફ્લો

દેવભૂમિ દ્વારકાના કલ્યાણપુર તાલુકામાં આવેલો શેઢાભાડથરી ડેમ ઓવરફ્લો થયો છે. ડેમ ઓવરફ્લો થતા ખેડૂતોના રવિ પાકને ફાયદો થશે. ડેમ ભરાઈ જતા નિચાણવાળા વિસ્તારમાં રહેતા લોકોને સલામત સ્થળે ખસી જવા સૂચના અપાઈ છે. કાનપર શેરડી, ચૂર, ચપર, માંગલિયા, હરિપર ગામોને એલર્ટ કરાયા છે.

ભારે વરસાદના કારણે દ્વારકા અને જામખંભાળીયાનો હાઈવે બંધ થયો છે. જામખંભાળીયા નજીક આવેલા ખોડિયાર મંદિર પાસેના ડાયવર્ઝન પર વરસાદી પાણી ફરી વળ્યાં છે. પુલનું કામ ચાલતું હોય ત્યારે ડાયવર્ઝન પર વરસાદી પાણી ફરી વળતા રસ્તો બંધ થયો હતો. હાઇવે બંધ થતાં વાહનોની લાંબી કતાર જોવા મળી.

દેવભૂમિ દ્વારકા જિલ્લાના જામખંભાળિયા પંથકમાં છેલ્લા 24 કલાકમાં 7 ઇંચથી વધુ વરસાદ વરસ્યો હતો. ધોધમાર વરસાદ પડવાથી શહેરના મુખ્ય માર્ગો પર ચોતરફ પાણી ભરાયાં હતાં, જ્યારે જિલ્લાના રાવલમાં પણ ભારે વરસાદ પડતાં ચોતરફ પાણી ફરી વળ્યાં હતાં.

દેવભૂમિ દ્વારકાના ખંભાળિયામાં અલગ-અલગ વિસ્તારોમાં મોડી રાત્રે ધોધમાર વરસાદ વરસ્યો છે, જેમાં નગરગેટ, રામનાથ સોસાયટી રોડ અને લુહાર શાળ સહિતના રસ્તાઓ પર વરસાદી પાણી ફરી વળ્યાં હતાં. ભારે વરસાદને લીધે રસ્તાઓ પર પાણી વહેતાં થતાં નદી જેવાં દૃશ્યો સર્જાયાં હતાં.

જામનગરમાં બુધવારે બપોરના સમયે ગાજવીજ અને ભારે પવન સાથે વરસાદ વરસતાં રસ્તાઓ પર પાણી ભરાયાં હતાં. રસ્તાઓ પર જળબંબાકારની સ્થિતિ સર્જાતાં વાહનચાલકોની હાલાકી વધી હતી. થોડા દિવસ પહેલાં શહેરના નદી કાંઠા વિસ્તારમાં પાણી ભરાવાની સમસ્યા સર્જાઈ હતી, જેથી ફરી એકવાર જામનગર શહેરમાં અને આસપાસના વિસ્તારોમાં ધોધમાર વરસાદ શરૂ થતાં લોકોની ચિંતા વધી છે.