GUJARAT : આરોગ્ય ક્ષેત્રે નીતિ આયોગે ગુજરાતને આપ્યો પ્રથમ નંબર, નાયબ મુખ્યપ્રધાને આપી વિસ્તૃત માહિતી

GUJARAT : રાજયના આરોગ્ય પ્રધાન અને નાયબ મુખ્યપ્રધાન નીતિન પટેલે એક પત્રકાર પરિષદ યોજી હતી. જેમાં ગુજરાતની આરોગ્ય સેવા બાબતે માહિતી આપી હતી. તેમણે જણાવ્યું કે દેશભરમાં આરોગ્ય ક્ષેત્રે ગુજરાતે ડંકો વગાડ્યો છે. નીતિ આયોગે આરોગ્ય સેવાઓમાં દેશભરમાં 86 ગુણ સાથે ગુજરાતને પહેલો નંબર આપ્યો છે. દેશમાં પ્રતિ લાખે 113નો માતા મૃત્યુ દર છે. જેની સામે ગુજરાતમાં ફક્ત 75 માતા મૃત્યુ દર નોંધાયો છે.

આ સાથે નાયબ મુખ્યપ્રધાને ઉમેર્યું કે દેશમાં 94.4 ટકા પ્રસૂતિ સરકારી હોસ્પિટલમાં થાય છે. જેની સામે ગુજરાતમાં 99.5 ટકા પ્રસૂતિ સરકારી હોસ્પિટલમાં થાય છે. દેશભરમાં 36 બાળ મૃત્યુદરની સામે ગુજરાતમાં 31 બાળકો જ મૃત્યુ પામે છે. જો આરોગ્ય ક્ષેત્રે તબીબ, નર્સિંગ સ્ટાફની વાત કરીએ તો ગુજરાતમાં પ્રતિ 10 હજાર લોકો દીઠ 41 આરોગ્ય કર્મચારીઓનું સંખ્યાબળ છે.

સાથે જ નીતિન પટેલે જણાવ્યું કે 9થી 11 માસના બાળકોના રસીકરણમાં દેશમાં 91ની સામે ગુજરાતમાં 87 બાળકોને રસી અપાય છે. ટીબી મુક્ત ભારતના લક્ષ્યાંકમાં વસ્તીના ધોરણ પ્રમાણે પ્રતિ લાખે 177 લોકોને ટીબી મુક્ત કરવાના લક્ષ્ય સામે ગુજરાતમાં 232 લોકો ટીબી મુક્ત થાય છે. દેશમાં હાઈવે અકસ્માત થવામાં પ્રતિ લાખે 11.5નો લક્ષ્યાંક છે જેની સામે ગુજરાતમાં 10.8 રેશિયો છે.

આ ઉપરાંત, નીતિન પટેલે ઉર્મેયું કે પ્રસૂતિ સમયે માતા કે બાળકના મૃત્યુ થવાની સંભાવના હતી ત્યારે ગુજરાત સરકારે મોટું કામ હાથમાં લીધું છે. પ્રસૂતિ સરકારી હોસ્પિટલમાં જ કરાવવા માટે સરકારે વ્યવસ્થા કરી છે. દેશમાં પ્રતિ 10 હજાર વસ્તીએ 1 તબીબ, નર્સ સહિત 37 કર્મચારી ઉપલબ્ધ થાય તેવું ધોરણ નક્કી કર્યું છે.જેની સામે ગુજરાતમાં 41 કર્મચારીનું સંખ્યા બળ ઉપલબ્ધ છે.

કોરોના મહામારી દરમિયાન માતા-પિતાનું મૃત્યુ થયું હોય તેવા કિસ્સામાં મૃત્યુ સર્ટિ તથા સાક્ષી તેમજ વાલીઓના આધાર-પુરાવા રજૂ કરવાના રહેશે.મરણ સર્ટિમાં કોરોનાથી મોત થયું હોય તેવો ઉલ્લેખ નહિ હોય તો પણ સહાય મળશે તેમ પણ નાયબ મુખ્યપ્રધાને ઉમેર્યું હતું.