Ahmedabad: હેબતપુરનાં ડબલ મર્ડર કેસમાં આરોપીની વિકૃત માનસિકતા, હત્યા કરીને મૃતદેહ અને છરી સાથે લીધી સેલ્ફી

Ahmedabadનાં હેબતપુરમાં સિનિયર સિટીઝન દંપતીની હત્યાના કેસમાં આરોપીની વિકૃત માનસિકતા સામે આવી છે. પોલીસની પૂછપરછમાં ઘટસ્ફોટ થયો છે કે નીતિન નામના આરોપીએ હત્યા કર્યા બાદ લોહીથી લથબથ મૃતદેહ અને છરી સાથે સેલ્ફી લીધી હતી.

ઝડપાયેલા પાંચેય આરોપીઓ હાલ 10 દિવસના રિમાન્ડ હેઠળ છે. આ દરમિયાન પોલીસે તેમની સઘન પૂછપરછ હાથ ધરતા જાણવા મળ્યું હતું કે, બે આરોપીઓની બહેનના લગ્ન હોવાથી તેમને 2 લાખ રૂપિયાની જરૂર હતી. આથી તેમણે લૂંટનો પ્લાન કર્યો હતો. જોકે તેમણે પકડાઈ જવાની બીકે સિનિયર સિટીઝન દંપતીની હત્યા કરી નાખી હતી. આરોપીઓમાંથી નીતિન ગૌડે વૃદ્ધ દંપતીની હત્યા કર્યા બાદ લોહીથી લથપથ તેમના મૃતદેહો પાસે છરી હાથમાં લઈ સેલ્ફી લીધી હતી.

પોલીસે નીતિનનો મોબાઇલ FSLમાં મોકલી આપ્યો છે.. આ દરમિયાન આરોપીઓએ કબૂલાત કરી હતી કે, હત્યા કર્યા બાદ ચાર જણ બે અલગ અલગ બાઇક પર નાસી ગયા હતા અને વૈષ્ણોદેવી એકઠા થઈ ત્યાંથી હિંમતનગર ગયા હતા. ત્યારબાદ ત્યાંથી ચિત્તોડગઢ અને ત્યાંથી પોતાના વતન ગ્વાલિયરના ગિઝોરા ગામ પહોંચી ગયા હતા. બે આરોપીએ પૂછપરછમાં કહ્યું હતું કે, બહેનના લગ્નમાં દહેજ પેટે બુલેટ અને દાગીના આપવાના હોવાથી પૈસાની જરૂર હતી, જેથી લૂંટ કરી હતી. જોકે અન્ય બે આરોપી મોજશોખના પૈસા માટે લૂંટમાં જોડાયા હોવાનું પોલીસનું અનુમાન છે. આરોપીઓ હાલ 10 દિવસના રિમાન્ડ પર છે.