WhatsAppના 50 કરોડ યુઝર્સના ફોન નંબર વેચાઈ રહ્યા છે ઓનલાઈન, ક્યાંક તમે તો નથીને આમા સામેલ
દાવો કરવામાં આવ્યો છે કે લગભગ 50 કરોડ WhatsApp વપરાશકર્તાઓના મોબાઇલ નંબર વેચાણ માટે ઉપલબ્ધ છે. ડેટાબેઝમાં 84 જુદા જુદા દેશોના વોટ્સએપ યુઝર્સના મોબાઈલ નંબર છે. જેમાં અમેરિકા, બ્રિટન, ઇજિપ્ત, ઇટાલી, સાઉદી અરેબિયા અને ભારતનો સમાવેશ થાય છે.
વોટ્સએપના લગભગ 50 કરોડ યુઝર્સના ફોન નંબર ઓનલાઈન વેચાણ માટે મૂકવામાં આવ્યા છે. આ ઈતિહાસમાં સૌથી મોટા ડેટા ભંગમાંથી એક હોઈ શકે છે. સાયબર ન્યૂઝના અહેવાલ મુજબ હેકિંગ કોમ્યુનિટી ફોરમ પર એક જાહેરાત પોસ્ટ કરવામાં આવી છે, જેમાં દાવો કરવામાં આવ્યો છે કે લગભગ 50 કરોડ WhatsApp વપરાશકર્તાઓના મોબાઈલ નંબર વેચાણ માટે ઉપલબ્ધ છે. ડેટાબેઝમાં 84 જુદા જુદા દેશોના વોટ્સએપ યુઝર્સના મોબાઈલ નંબર છે. જેમાં અમેરિકા, બ્રિટન, ઈજિપ્ત, ઈટાલી, સાઉદી અરેબિયા અને ભારતનો સમાવેશ થાય છે.
ડેટાનો ઉપયોગ ફિશિંગ અટેક માટે થાય છે
સાયબર ગુનેગારો મુખ્યત્વે ફિશિંગ અટેક માટે આ માહિતીનો ઉપયોગ કરે છે. એટલા માટે વોટ્સએપ યુઝર્સને સલાહ આપવામાં આવે છે કે તેઓ અજાણ્યા નંબરોથી આવતા કોલ અને મેસેજથી સાવચેત રહે. હેકિંગ ફોરમ પર એવો દાવો કરવામાં આવ્યો છે કે આ ડેટામાં 32 મિલિયનથી વધુ અમેરિકન યુઝર્સના ફોન નંબર હાજર છે. એ જ રીતે પ્રભાવિત વપરાશકર્તાઓમાંથી 45 મિલિયન ઈજિપ્તમાં, 35 મિલિયન ઈટાલીમાં, 29 મિલિયન સાઉદી અરેબિયામાં, 20 મિલિયન ફ્રાન્સમાં અને 20 મિલિયન તુર્કીમાં છે. આ ડેટાબેઝમાં રશિયામાં લગભગ 10 મિલિયન વપરાશકર્તાઓ અને બ્રિટનમાં 11 મિલિયનથી વધુ વપરાશકર્તાઓના ફોન નંબર શામેલ છે.
રિપોર્ટમાં કહેવામાં આવ્યું છે કે ગુનેગારો અમેરિકન યુઝર્સના ડેટાને લગભગ 5,71,690 રૂપિયામાં વેચી રહ્યા છે. આ સિવાય યુકેનો ડેટાબેઝ લગભગ રૂ. 2,04,175માં અને જર્મનીનો ડેટાબેઝ રૂ. 1,63,340 કરોડમાં ઉપલબ્ધ છે. રિપોર્ટમાં વધુમાં જણાવવામાં આવ્યું છે કે ઘણી વખત ઓનલાઈન મુકવામાં આવેલો આટલો મોટો ડેટા WhatsAppની સેવાની શરતોનું ઉલ્લંઘન કરીને મેળવવામાં આવે છે.
એક્ટિવ યુઝર્સનો છે ડેટા
જો કે વેચનાર દાવો કરે છે કે તમામ નંબરો મેટા-માલિકીના પ્લેટફોર્મના સક્રિય વપરાશકર્તાઓના છે. જ્યારે ગુનેગારોએ ડેટાબેઝ કેવી રીતે મેળવ્યો તે જણાવ્યું નથી, વિક્રેતા કહે છે કે તેઓએ ડેટા એકત્રિત કરવા માટે તેમની પોતાની યુક્તિઓનો ઉપયોગ કર્યો. આ પહેલીવાર નથી, જ્યારે મેટા અને તેના પ્લેટફોર્મ્સ ડેટાના ભંગ માટે સમાચારમાં આવ્યા હોય. ગયા વર્ષે એક ગુનેગાર 500 મિલિયનથી વધુ ફેસબુક વપરાશકર્તાઓની માહિતી મફતમાં ઑનલાઈન ઓફર કરી રહ્યો હતો. તે સમયે લીક થયેલા ડેટામાં ફોન નંબરની સાથે અન્ય વિગતો પણ સામેલ હતી.