India Vs Pakistan Men’s Hockey Asia Cup Match Report: ભારત અને પાકિસ્તાન વચ્ચેની મેચ 1-1 થી ડ્રો, અંતિમ પળે પાકિસ્તાને ગોલ કરી લીધો હતો
Ind vs Pak Hockey Team Highlights: ભારતીય ટીમે પ્રથમ ક્વાર્ટરની શરૂઆતમાં લીડ લીધી હતી, પરંતુ તેને વધારવામાં નિષ્ફળ રહી હતી.
એશિયા કપ 2022 ની શરૂઆત ભારતીય પુરુષ હોકી ટીમ (Indian Men’s Hockey Team) માટે સારી રહી નથી. જકાર્તામાં રમાઈ રહેલા એશિયા કપ હોકી 2022 (Asia Cup Hockey 2022) માં તેમના ગ્રુપ સ્ટેજની પહેલી જ મેચમાં, ભારતને તેમના સૌથી જૂના અને સૌથી કટ્ટર હરીફ પાકિસ્તાન સામે 1-1 થી ડ્રોથી સંતોષ માનવો પડ્યો હતો. મેચના પહેલા ક્વાર્ટરમાં જ સરસાઈ મેળવનારી ભારતીય ટીમે બાકી રહેલી તકોનો ફાયદો ઉઠાવ્યો ન હતો અને ટીમને તેનું પરિણામ ભોગવવું પડ્યું હતું. પાકિસ્તાને હૂટરના અવાજની માત્ર એક મિનિટ પહેલા ગોલ કરીને મેચ ડ્રો પર સમાપ્ત કરવામાં સફળ રહી હતી.
પૂલ A ની મેચમાં પાકિસ્તાને ઝડપી શરૂઆત કરી અને પ્રથમ સાત-આઠ મિનિટમાં જ તેને બે પેનલ્ટી કોર્નર (PC) મળ્યા, પરંતુ ટીમ તેને ગોલમાં પરિવર્તિત કરી શકી નહીં. આ દરમિયાન ભારતે તેની પ્રથમ PC પણ ગુમાવ્યુ, પરંતુ થોડા જ સમયમાં ફરી પાકિસ્તાનની ડીમાં પ્રવેશ કરીને દબાણ બનાવ્યું અને તેનું સારું પરિણામ પણ આવ્યું.
પ્રથમ ક્વાર્ટરમાં ભારત આગળ હતુ
પ્રથમ ક્વાર્ટરની આઠમી મિનિટે ભારતને સતત બે પેનલ્ટી કોર્નર મળ્યા, જેમાં ભારતે લીડ લેવાના બીજા પ્રયાસમાં પહેલો ગોલ કર્યો. યુવા ખેલાડી સેલ્વમ કાર્તિએ આંતરરાષ્ટ્રીય ક્રિકેટમાં પદાર્પણ કરીને ભારતને લીડ અપાવી હતી. આ પછી પણ ભારતને કેટલીક તકો મળી, પરંતુ સફળતા મળી ન હતી અને પ્રથમ ક્વાર્ટર 1-0 થી ભારતની તરફેણમાં રહ્યો હતો. તે જ સમયે, પ્રથમ હાફના બીજા ક્વાર્ટરમાં ભારતનો દબદબો હતો અને ફરી એકવાર ટીમ પેનલ્ટી કોર્નર પર ગોલ કરવાની નજીક હતી, પરંતુ પાકિસ્તાનના ગોલકીપરે સારો બચાવ કરીને ભારતને સ્કોરલાઈન વધારતા અટકાવ્યું હતું.
ટીમ ઈન્ડિયાએ તક ગુમાવી, પાકિસ્તાનને ફાયદો થયો
ત્રીજા ક્વાર્ટર (બીજા હાફ)માં, પાકિસ્તાને ઝડપી શરૂઆત કરી અને પહેલી જ મિનિટમાં પીસી મેળવ્યું, પરંતુ ટીમ આ વખતે પણ ચૂકી ગઈ. તે જ સમયે, પાકિસ્તાને ઘણા પ્રસંગો પર સારી ગ્રાઉન્ડ મૂવ કરી હતી, પરંતુ સચોટ ફિનિશિંગના અભાવે, તેઓ ભારતની બરાબરી કરી શક્યા ન હતા. બીજી તરફ ભારતે પણ ઘણી તક ગુમાવી હતી. છેલ્લા ક્વાર્ટરમાં, પાકિસ્તાને ગોલની શોધમાં તેમના હુમલાને વેગ આપ્યો અને 59મી મિનિટમાં તેમને બીજો પેનલ્ટી કોર્નર મળ્યો અને આ વખતે અબ્દુલ રાણાએ ગોલ કરીને ટીમને બરાબરી કરી અને ભારતના પ્રયાસને નિષ્ફળ બનાવ્યો.
Here are the highlights from our first match against Pakistan in the Hero Asia Cup 2022, which took place at the GBK Hockey field in Jakarta, Indonesia.#IndiaKaGame #HockeyIndia #HeroAsiaCup #INDvsPAK #MatchDay @CMO_Odisha @sports_odisha @IndiaSports @Media_SAI pic.twitter.com/tQxEzIdjFM
— Hockey India (@TheHockeyIndia) May 23, 2022
આગામી મેચ જાપાન સામે
ટોક્યો ઓલિમ્પિકમાં બ્રોન્ઝ મેડલ જીત્યા બાદ ભારતીય ટીમ પહેલીવાર મોટી ટુર્નામેન્ટમાં ઉતરી રહી છે, પરંતુ આ વખતે પણ મોટાભાગના યુવા ખેલાડીઓને તક આપવામાં આવી છે. ટીમના 9 ખેલાડીઓએ પાકિસ્તાન સામે આંતરરાષ્ટ્રીય ક્રિકેટમાં પદાર્પણ કર્યું હતું. સ્વાભાવિક છે કે આવી સ્થિતિમાં ભારતીય ટીમ બહુ મજબૂત દેખાતી નથી, પરંતુ આવનારી મેચોમાં ટીમને તેમાં સુધારો કરવાની જરૂર પડશે. ટીમની આગામી મેચ મંગળવાર 24 મેના રોજ જાપાન સામે છે, જેણે તેની પ્રથમ પૂલ A મેચમાં ઇન્ડોનેશિયાને 9-0 થી હરાવ્યું હતું.