IND vs ENG: પ્રથમ દિવસની રમતના અંતે ભારતે 3 વિકેટ ગુમાવી 99 રન કર્યા, રોહિત શર્માની ફીફટી
ભારત અને ઈંગ્લેન્ડ (India vs England) વચ્ચેની ચાર ટેસ્ટ મેચોની શ્રેણીમાં ત્રીજી ટેસ્ટ અમદાવાદના નરેન્દ્ર મોદી સ્ટેડિયમ (Narendra Modi Stadium)માં રમાઈ.
ભારત અને ઈંગ્લેન્ડ (India vs England) વચ્ચેની ચાર ટેસ્ટ મેચોની શ્રેણીમાં ત્રીજી ટેસ્ટ અમદાવાદના નરેન્દ્ર મોદી સ્ટેડિયમ (Narendra Modi Stadium)માં રમાઈ. ત્રીજી ટેસ્ટમાં ઈંગ્લેન્ડના કેપ્ટન જો રુટ (Joe Root)એ ટોસ જીતીને પ્રથમ બેટીંગ કરવાનો નિર્ણય લીધો હતો. પ્રથમ બેટીંગ કરવા માટે મેદાનમાં ઉતરેલી ટીમ ઈંગ્લેન્ડ માત્ર 112 રન કરીને જ ઓલઆઉટ થઈ ગઈ હતી. ભારત તરફથી અક્ષર પટેલ (Akshar Patel) 6 વિકેટ ઝડપી હતી. જ્યારે રવિચંદ્રન અશ્વિને (Ashwin) ત્રણ ત્રણ વિકેટ ઝડપી હતી. જ્યારે પ્રથમ ઈનીંગમાં બેટીંગ કરવા માટે મેદાનમાં ઉતરેલી ટીમ ઈન્ડીયાના રોહિત શર્મા (Rohit Sharma)એ અર્ધશતક સાથે રમતમાં છે. ડે નાઈટ ટેસ્ટની પ્રથમ દિવસની રમતના અંતે ભારત 3 વિકેટે 99 રન કર્યા હતા.
રોહિત શર્માએ આજે શાનદાર રમત દર્શાવી હતી. રોહિત શર્માએ 82 બોલ રમીને 57 રન કર્યા હતા. જેમાં તેણે 9 ચોગ્ગા લગાવ્યા હતા. શુભમન ગીલ 51 બોલ રમીને 11 રન કરીને પોતાની વિકેટ ગુમાવી હતી. ભારતે ગીલના સ્વરુપમાં પ્રથમ વિકેટ 33 રનના સ્કોર પર ગુમાવી હતી. ત્યારબાદ તરત જ ચેતેશ્વર પુજારાની પણ આઉટ થતાં 34 રનના ટીમ સ્કોર પર ભારતે બે વિકેટ ગુમાવી દીધી હતી. ચેતેશ્વર પુજારા શૂ્ન્ય રનના વ્યક્તિગત સ્કોર પર જ જેક લીચના બોલ પર એલબીડબલ્યુ આઉટ થયો હતો. કેપ્ટન વિરાટ કોહલી પણ ખાસ રમત દાખવી શક્યો નહોતો. તેમે 27 રન 58 બોલ રમીને કર્યા હતા. તેનો એક આસાન કેચ એન્ડરસનના બોલ પર છુટતા જીવતદાન મળ્યુ હતુ, આમ છતાં તે પોતાની પારી વધારે લંબાવી શક્યો નહોતો. કોહલી જેક લીચના બોલ પર ક્લીન બોલ્ડ થયો હતો.
ઈંગ્લેન્ડ તરફથી સ્પિનર જેક લીચે જબરદસ્ત બોલીંગ કરી હતી. તેણે 10 ઓવર કરીને 2 મહત્વની વિકેટ ઝડપી હતી. તેણે પૂજારા અને વિરાટ કોહલીની વિકેટોને ઝડપી હતી. જ્યારે જોફ્રા આર્ચરે એક વિકેટ ઝડપી હતી. આર્ચરે શરુઆતમાં જ શુભમન ગીલની વિકેટ ઝડપીને ઈંગ્લેન્ડને શરુઆતી રાહત આપી હતી. જોકે રોહિત શર્માએ જવાબદારી ઉપાડી લેતા સ્કોર બોર્ડને ફરતુ રાખ્યુ હતુ. ઇંગ્લેંડે બેટીંગમાં નિષ્ફળતા બાદ બોલીંગ વડે મેચમાં પરત ફરવા માટે કમર કસી છે. જોકે ગુરુવારની રમતની શરુઆત કેવી રહે છે, તેનાથી મેચ પર પકડ કોની રહેશે તે નક્કી થશે.