WTC Final: ન્યુઝીલેન્ડ અને ટીમ ઇન્ડીયા વચ્ચે આજે કશ્મકશ રમતનો દિવસ, આજે રિઝર્વ ડેની રમત પર નજર
આઇસીસી વિશ્વ ટેસ્ટ ચેમ્પિયનશીપ (World Test Championship) ની ફાઇનલ મેચનુ પરિણામ આવે તે માટે, આજે રિઝર્વ ડે (Reserve Day) ના રોજ રમત રમાશે. મેચના છઠ્ઠા દિવસે, ભારતના બીજા દાવ માટે વિરાટ કોહલી અને ચેતેશ્વર પુજારા મેદાનમાં ઉતરશે.
આઇસીસી વિશ્વ ટેસ્ટ ચેમ્પિયનશીપ (World Test Championship) ની ફાઇનલ મેચ માં આજે રિઝર્વ ડે (Reserve Day) ની રમત રમાનારી છે. ભારત અને ન્યુઝીલેન્ડ (India Vs New Zealand) વચ્ચે સાઉથમ્પટન (Southampton) ના ધ એજીસ બાઉલ સ્ટેડીયમમાં મેચ રમાઇ રહી છે. પાંચમાં દિવસની રમત અંતે ભારતીય ટીમે (Team India) 2 વિકેટ ગુમાવીને 64 રન કર્યા છે. હવે આજે મંગળવારે રિઝર્વ ડે મેચનુ પરિણામ નક્કિ કરશે. ICC એ રમતમાં સમયના નુકશાનને ની સ્થિતીને ધ્યાને રાખી અગાઉ થી જ 23 જૂનને રિઝર્વ ડેનો વિકલ્પ રાખ્યો હતો. ભારતીય ટીમ 32 રનની લીડ સાથે આજે રમતની શરુઆત કરશે.
આ પહેલા ન્યુઝીલેન્ડની ટીમ 249 રન પર ઓલઆઉટ થઇ હતી. ભારતીય ઝડપી બોલર મહંમદ શામીએ 4 વિકેટ ઝડપી હતી. જ્યારે ન્યુઝીલેન્ડ તરફ થી ડેવોન કોન્વે એ સૌથી વધારે 54 રનની ઇનીંગ રમી હતી. કોન્વે ઉપરાંત કેપ્ટન કેન વિલિયમસને (Kane Williamson) 49 રન બનાવ્યા હતા. ન્યુઝીલેન્ડ એ પ્રથમ ઇનીંગના આધાર પર 32 રનની લીડ મેળવી હતી.
ભારતીય ટીમે ટોસ હારીને પ્રથમ બેટીંગ કરતા 217 રનની ઇનીંગ રમી હતી. ઇન્ડીયન ટેસ્ટ ક્રિકેટના વાઇસ કેપ્ટન અજીંકય રહાણેએ 49 રન કર્યા હતા. જ્યારે કેપ્ટન વિરાટ કોહલી (Virat Kohli) એ 44 રન કર્યા હતા. પાંચ દિવસની રમત દરમ્યાન વરસાદે મેચને ખૂબ પ્રભાવિત કરી હતી. પ્રથમ અને ચોથા દિવસે એક પણ બોલની રમત રમી શકાઇ નહોતી. જ્યારે બીજા અને ત્રીજા દિવસે પૂર્ણ ઓવરની રમત રમી શકાઇ નહોતી. આમ હવે મેચ રિઝર્વ ડે સુધી પહોંચી છે.
રિઝર્વ ડેના દિવસે ભારતીય ટીમ 2 વિકેટે 64 રનના સ્કોર થી રમતની શરુઆત કરશે. પાંચમાં દિવસના અંતે વિરાટ કોહલી અને ચેતેશ્વર પુજારા (Cheteshwar Pujara) ક્રિઝ પર હતાં. બંને આજે મેચને આગળ વધારશે. બંને પાસે આજે પરિણામ લક્ષી રમતની આશા વર્તાઇ રહી છે. બંનેની રમત મેચની દિશા નક્કી કરશે.
મેચ ડ્રો રહેવાની સ્થિતીમાં બંને ટીમો સંયુક્ત વિજેતા
મેચના છઠ્ઠા દિવસ પર પરિણામ આવવાની આશા રાખવામાં આવી રહી છે. જોકે છઠ્ઠા દિવસની રમત મેચ ડ્રોમાં પહોંચે છે કે, ટેસ્ટ ચેમ્પિયન મળે છે તે જોવાનુ રહેશે. મેચ ડ્રો થવાની સ્થિતીમાં બંને ટીમોને સંયુક્ત વિજેતા ઘોષીત કરવામાં આવશે.
આજે હવામાન સારુ રહેવાની આશા
આજે હવામાન સારુ રહેવાની અનુમાન કરવામાં આવ્યુ છે. આજના દિવસે 98 ઓવર સુધીની મેચ રમી શકાશે, તેવી આશા છે. આજે હળવા વરસાદની આગાહી દરમ્યાન પણ વાતાવરણ ખુલ્લુ રહેશે એમ વેધર રિપોર્ટમાં અનુમાન દર્શાવાયુ છે.
બે વર્ષ અગાઉ ન્ચુઝીલેન્ડ સામે રિઝર્વ ડેમાં મેચ ગુમાવી હતી
ન્યુઝીલેન્ડ ની ટીમ બે વર્ષ પહેલા રિઝર્વ ડે પર ભારતને હરાવી ચુકી છે. વન ડે વિશ્વકપ 2019ની સેમીફાઇનલ મેચ ભારત અને ન્યુઝીલેન્ડ વચ્ચે રમાઇ હતી. જેમાં વરસાદે ખલેલ પહોંચાડ્યો હતો. જેને લઇને સેમીફાઇનલ મેચ બીજા દિવસે પુરી થઇ શકી હતી. જેમાં ભારતીય ટીમે હાર મેળવી હતી. માંચેસ્ટરમાં રમાયેલી મેચમાં પ્રથમ ઇનીંગમાં 239 રન ન્યુઝીલેન્ડ એ બનાવ્યા હતા. જેના જવાબમાં ભારતીય ટીમ 221 રનમાં ઓલઆઉટ થઇ જતા, 18 રને હાર મળી હતી.
Latest News Updates
