IND vs NZ: કાનપુર ટેસ્ટ ડ્રો જતા ટીમ ઇન્ડિયાને WTC પોઇન્ટ ટેબલમાં થયુ આ નુકશાન, પાકિસ્તાન તકનો લાભ ઉઠાવવા તૈયાર!
જો તે આ મેચ જીતી તો ભારતીય ટીમ (Team India) ને 12 પોઈન્ટ મળ્યા હોત, પરંતુ તેણે આ તક ગુમાવી દીધી અને તેને ન્યૂઝીલેન્ડ સાથે પોઈન્ટ શેર કરવાની ફરજ પડી.
કાનપુર ટેસ્ટ (Kanpur Test) માં ટીમ ઈન્ડિયા ન્યુઝીલેન્ડ (New Zealand Cricket Team) સામે જીતની નજીક આવવાથી ચૂકી ગઈ હતી. વિશ્વની નંબર વન ટેસ્ટ ટીમ અને વિશ્વની નંબર 2 ટેસ્ટ ટીમ વચ્ચે રમાયેલી, આ મેચ પાંચમા દિવસના છેલ્લા બોલ અને છેલ્લી વિકેટ સુધી ગઈ હતી,. જેમાં વિશ્વ ટેસ્ટ ચેમ્પિયન ન્યુઝીલેન્ડે લડાઈ લડતા ભારત (Indian Cricket Team) ને જીતથી દૂર રાખ્યું હતું. આ પરિણામ સાથે, ભારતીય ટીમ શ્રેણીમાં 1-0ની લીડ લેવાનું ચૂકી ગઈ હતી, પરંતુ વર્લ્ડ ટેસ્ટ ચેમ્પિયનશિપ (ICC World Test Championship) ના WTC પોઈન્ટ્સ ટેબલ (WTC Points Table) માં ટીમ ઈન્ડિયાને તેનાથી પણ મોટી ખોટ થઈ હતી.
જ્યાં ભારતીય ટીમે સંપૂર્ણ 12 પોઈન્ટ મેળવવાની તક ગુમાવી, જ્યારે ન્યુઝીલેન્ડે આ ડ્રો સાથે પોતાનું ખાતું ખોલ્યું. ભારતીય ટીમ હજુ પણ પોઈન્ટ ટેબલમાં બીજા નંબર પર છે, પરંતુ તે ત્રીજા સ્થાને સરકી શકે છે કારણ કે પાકિસ્તાન (Pakistan Cricket Team) ટક્કર લેવાના પ્રયાસમાં છે.
ગ્રીન પાર્ક સ્ટેડિયમમાં ભારતે ન્યૂઝીલેન્ડ સામે 234 રન પર તેનો બીજો દાવ ડિકલેર કર્યો હતો અને 284 રનનો લક્ષ્યાંક આપ્યો હતો. ભારતને પણ ન્યૂઝીલેન્ડની પ્રથમ વિકેટ ચોથા દિવસના અંતે માત્ર 4 રનના સ્કોર પર મળી હતી. આવી સ્થિતિમાં ટીમ ઈન્ડિયાને છેલ્લા દિવસે 9 વિકેટની જરૂર હતી, જ્યારે ન્યુઝીલેન્ડને 280 રનની જરૂર હતી. ભારતીય સ્પિનરોએ અંતિમ દિવસે પુરી તાકાત લગાવી હતી અને ન્યૂઝીલેન્ડની 8 વિકેટ ઝડપીને જીતની આરે પહોંચી હતી. પરંતુ છેલ્લા અડધા કલાકમાં રચિન રવિન્દ્ર અને એજાઝ પટેલે લગભગ 9 ઓવર રમીને ભારતને જીતથી દૂર લઈ લીધું હતા.
WTC પોઈન્ટ ટેબલમાં ભારતનું સ્થાન
આ ડ્રો ટીમ ઈન્ડિયા માટે હાર સાબિત થઇ કારણ કે ભારતીય ટીમને આ મેચમાં જીત સાથે મળનારા 12 પોઈન્ટને બદલે માત્ર 4 પોઈન્ટ મળ્યા હતા. આ રીતે, ટીમ ઈન્ડિયાના WTC ટેબલમાં હવે 30 પોઈન્ટ છે અને કુલ 50 પોઈન્ટ પર્સેન્ટેઝ થઇ ગયા છે. મતલબ કે ટીમ ઈન્ડિયાએ WTCમાં અત્યાર સુધી 5 ટેસ્ટ રમી છે, જેમાં તેને 60 પોઈન્ટ માટે મેચમાં માત્ર અડધા પોઈન્ટ મળ્યા છે. બીજી તરફ, WTCમાં પોતાની પ્રથમ મેચ રમી રહેલી ન્યુઝીલેન્ડને આ ટેસ્ટમાં 4 પોઈન્ટ મળ્યા છે અને તે 33% સાથે પાંચમા સ્થાને છે.
Here’s how the teams stack up in the #WTC23 standings after that thrilling draw between India and New Zealand in Kanpur 👀 pic.twitter.com/VxGmkMlbfQ
— ICC (@ICC) November 29, 2021
પાકિસ્તાન ભારત કરતા આગળ જશે
આ ટેબલમાં ટોચ પર શ્રીલંકા છે, જેણે માત્ર એક જ ટેસ્ટ મેચ રમી હતી અને વિજય સાથે 100% પોઈન્ટ મેળવીને પ્રથમ સ્થાન મેળવ્યું હતું. બીજા સ્થાન પર ભારત છે, પરંતુ પાકિસ્તાની ટીમ આ મામલે ભારતને પાછળ છોડી શકે છે. પાકિસ્તાન અને બાંગ્લાદેશ (Pakistan vs Bangladesh) વચ્ચે ચટગાંવમાં ટેસ્ટ મેચ રમાઈ રહી છે અને ત્યાં પાકિસ્તાન જીતથી માત્ર 93 રન દૂર છે. જો પાકિસ્તાન ત્યાં જીતશે તો તે ભારતથી ઉપર બીજા સ્થાને આવી જશે.
ભારતીય ટીમ માટે આ શ્રેણી જીતવાની છેલ્લી તક હવે મુંબઈ ટેસ્ટમાં હશે. બીજી ટેસ્ટ 3 ડિસેમ્બરથી શરૂ થશે અને ભારતીય ટીમે આ મેચ જીતીને સંપૂર્ણ 12 પોઈન્ટ મેળવવા પડશે, જેથી તે પોઈન્ટ ટેબલમાં પોતાની સ્થિતિ સુધારી શકે.