IND vs SA: ટીમ ઇન્ડિયાના સાઉથ આફ્રિકા પ્રવાસને લઇ Omicron વેરિએન્ટનુ સંકટ, આફ્રિકન સરકારે સુરક્ષાની આપી ગેરંટી
ભારતીય ક્રિકેટ ટીમ (Indian Cricket Team) ડિસેમ્બરમાં દક્ષિણ આફ્રિકાના પ્રવાસ (IND VS SA) પર જવાની છે જ્યાં તે 3 ટેસ્ટ, 3 ODI અને 4 T20 મેચોની શ્રેણી રમશે.
શું ભારતીય ટીમ (Indian Cricket Team) સાઉથ આફ્રિકાના પ્રવાસે (South Africa Tour) જશે, આ સમયે આ સવાલ દરેક રમતપ્રેમીના મનમાં છે. વાસ્તવમાં, કોરોનાનું ઓમિક્રોન વેરિઅન્ટ (Omicron Variant) દક્ષિણ આફ્રિકામાં ઝડપથી ફેલાઈ રહ્યો છે. તેના પછી ભારતનો દક્ષિણ આફ્રિકા પ્રવાસ ખતરામાં છે. જોકે, દક્ષિણ આફ્રિકાની સરકારે ટીમ ઈન્ડિયા (Team India) ને સુરક્ષિત રાખવાની સંપૂર્ણ ગેરંટી આપી છે. દક્ષિણ આફ્રિકાના વિદેશ મંત્રાલયે કહ્યું છે, કે ભારતીય ક્રિકેટ ટીમ માટે સંપૂર્ણ બાયો-સેફ વાતાવરણ (બાયો-બબલ) બનાવવામાં આવશે.
મંત્રાલયે કોવિડ-19નું નવું સ્વરૂપ મળવા છતાં ભારત ‘એ’ ટીમના પ્રવાસમાંથી ખસી ન જવા બદલ BCCIની પ્રશંસા પણ કરી હતી. ભારત A મંગળવારથી બ્લૂમફોન્ટેનમાં દક્ષિણ આફ્રિકા A સામે બીજી બિનસત્તાવાર ટેસ્ટ રમશે. ભારતીય બોર્ડે નવા ઓમિક્રોન વેરિઅન્ટને કારણે વૈશ્વિક ચિંતાઓ છતાં દક્ષિણ આફ્રિકામાં શ્રેણી ચાલુ રાખવાનો નિર્ણય કર્યો છે. ભારતીય વરિષ્ઠ ટીમ પણ 17 ડિસેમ્બરથી દક્ષિણ આફ્રિકામાં ત્રણ ટેસ્ટ રમશે, ત્યારબાદ 3 ODI અને 4 T20I રમશે.
દક્ષિણ આફ્રિકાએ ભારતીય ખેલાડીઓની સુરક્ષાની ખાતરી આપી
વિરાટ કોહલી (Virat KOhli) અને તેની ટીમ 9 ડિસેમ્બરે દક્ષિણ આફ્રિકા પહોંચશે. પરંતુ દેશમાં કોવિડનું ઓમિક્રોન વેરિઅન્ટ મળ્યા બાદ પ્રવાસને લઈને કેટલીક ચિંતાઓ છે. આ નવા વેરિઅન્ટ પછી, ઘણા દેશોએ મુસાફરી પ્રતિબંધો લાદ્યા છે. ડિપાર્ટમેન્ટ ઓફ ઈન્ટરનેશનલ રિલેશન્સ એન્ડ કોઓપરેશન (ડુર્કો), જે દેશનું વિદેશ મંત્રાલય છે, એ કહ્યું, દક્ષિણ આફ્રિકા ભારતીય ટીમના સ્વાસ્થ્ય અને સુરક્ષાને સુનિશ્ચિત કરવા માટે તમામ જરૂરી સાવચેતીના પગલાં લેશે.
દક્ષિણ આફ્રિકા અને ભારત ‘A’ ટીમ સિવાય, બંને રાષ્ટ્રીય ટીમ માટે સંપૂર્ણપણે જૈવ-સુરક્ષિત વાતાવરણ બનાવવામાં આવશે. મંત્રાલયે જણાવ્યું હતું કે, ભારત ‘A’ ટીમનો પ્રવાસ ચાલુ રાખીને એકતા દર્શાવવાનો ભારતનો નિર્ણય ઘણા દેશોથી વિપરીત છે. જેમણે તેમની સરહદો બંધ કરવાનો અને દક્ષિણ આફ્રિકાથી મુસાફરી મર્યાદિત કરવાનો નિર્ણય લીધો છે, મંત્રાલયે જણાવ્યું હતું.
દક્ષિણ આફ્રિકાએ BCCI ની પ્રશંસા કરી
મંત્રાલયે કહ્યું કે દક્ષિણ આફ્રિકાની સરકાર પ્રવાસ ચાલુ રાખવા માટે BCCIની પ્રશંસા કરે છે. ભારત અને દક્ષિણ આફ્રિકા વચ્ચે પ્રથમ ટેસ્ટ જોહાનિસબર્ગમાં રમાશે. જ્યારે બીજી ટેસ્ટ 26 ડિસેમ્બરથી સેન્ચુરિયનમાં રમાશે. ત્રીજી મેચ 3 જાન્યુઆરીથી કેપટાઉનમાં રમાશે. મંત્રાલયે કહ્યું, ‘ભારતીય રાષ્ટ્રીય ટીમનો પ્રવાસ દક્ષિણ આફ્રિકાની આંતરરાષ્ટ્રીય ક્રિકેટમાં વાપસીની 30મી વર્ષગાંઠને પણ ચિહ્નિત કરશે.’
દક્ષિણ આફ્રિકાની સરકારની રંગભેદ નીતિઓને કારણે 1970માં આંતરરાષ્ટ્રીય ક્રિકેટ કાઉન્સિલ (ICC) દ્વારા દક્ષિણ આફ્રિકાની ટીમને આંતરરાષ્ટ્રીય ક્રિકેટમાંથી પ્રતિબંધિત કર્યા પછી, 1991માં ભારત દેશની આંતરરાષ્ટ્રીય ટીમની યજમાની કરનારો પ્રથમ દેશ બન્યો હતો.
મંત્રાલયે એક નિવેદનમાં જણાવ્યું હતું કે, વર્ષગાંઠ એક સન્માન સમારોહ સાથે ઉજવવામાં આવશે જે કેપટાઉનમાં 2 જાન્યુઆરી, 2022 ના રોજ યોજવામાં આવશે. આ ઇવેન્ટમાં દક્ષિણ આફ્રિકા અને ભારત વચ્ચેના મજબૂત સંબંધોને પણ દર્શાવવામાં આવશે. જે ફરી એકવાર બે ભારતીય ટીમના પ્રવાસ દ્વારા દર્શાવવામાં આવ્યું છે.