IPL 2022: ઓરેન્જ કેપ અને પર્પલ કેપમાં રાજસ્થાન રોયલ્સનો દબદબો, જાણો રેસમાં કોણ છે આગળ
IPL 2022 : ઇન્ડિયન પ્રીમિયર લીગ 2022 માં હાલ પોઇન્ટ ટેબલની વાત કરીએ તો નવી ટીમ ગુજરાત ટાઇટન્સ (Gujarat Titans) શરૂઆતથી જ ટોચ પર ચાલી રહી છે. જ્યારે રાજસ્થાન રોયલ્સ (Rajasthan Royals) ત્રીજા સ્થાને છે.
ઇન્ડિયન પ્રીમિયર લીગ (IPL 2022) માં હાલ મોટા ભાગની ટીમોએ 9 થી 10 મેચ રમી લીધી છે. ત્યારે ઓેરેન્જ અને પર્પલ કેપમાં ટોચના સ્થાને રાજસ્થાન રોયલ્સ (Rajasthan Royals) નો દબદબો છે. તો પોઇન્ટ ટેબલમાં નવી ટીમ ગુજરાત ટાઇટન્સ (Gujarat Titans) નો દબદબો છે. ગુજરાતની ટીમ લીગની શરૂઆતથી ટોચનું સ્થાન જાળવી રાખ્યું છે. ત્યારે પર્પલ કેપ અને ઓરેન્જ કેપમાં કોણ આગળ છે તેના પર એક નજર કરીએ. રાજસ્થાન રોયલ્સનો ઓપનર જોસ બટલર (Jos Buttler) IPLની આ સિઝનમાં ત્રણ દમદાર સદી સાથે સૌથી વધુ રન બનાવનાર બેટ્સમેન છે. તેણે ઓરેન્જ કેપ પર કબજો જાળવી રાખ્યો છે. IPL ના બીજા સપ્તાહથી તેની પાસે ઓરેન્જ કેપ છે.
જોસ બટલર બીજા સપ્તાહે પણ ટોચના સ્થાને
જોસ બટલર આ સિઝનમાં અદ્ભુત લયમાં જોવા મળી રહ્યો છે. તેણે 10 મેચમાં 65.33 ની એવરેજ અને 150.76 ની સ્ટ્રાઈક રેટથી 588 રન બનાવ્યા છે. મહત્વનું છે કે તેની આસપાસ અન્ય કોઈ બેટ્સમેન પણ નથી. બટલર પછી લખનૌ સુપર જાયન્ટ્સનો સુકાની કેએલ રાહુલ આવે છે. તે 2 સદી સાથે 451 રન બનાવીને ઓરેન્જ કેપની રેસમાં બીજા સ્થાને છે. સનરાઈઝર્સ હૈદરાબાદનો અભિષેક શર્મા પણ સતત રન બનાવીને ઓરેન્જ કેપની રેસમાં જોડાઈ ગયો છે. તેણે અત્યાર સુધીમાં 324 રન બનાવ્યા છે.
યુઝવેન્દ્ર ચહલ પર્પલ કેપમાં ટોચના સ્થાને છે
IPL 2022 ની પર્પલ કેપની રેસમાં હાલ રાજસ્થાન રોયલ્સ (Rajasthan Royals) ના બોલર યુઝવેન્દ્ર ચહલ (Yuzvendra Chahal) સૌથી આગળ છે. તે આ આઈપીએલમાં સૌથી વધુ વિકેટ લેનાર બોલર છે અને 19 બેટ્સમેનોને પેવેલિયનમાં મોકલવામાં આવ્યા છે. યુઝવેન્દ્ર ચહલે આ સિઝનમાં અત્યાર સુધી 40 ઓવર ફેંકી છે. આમાં તેણે 7.27 ની એવરેજથી ઓવર દીઠ રન આપ્યા છે અને 15.31 ની બોલિંગ એવરેજથી વિકેટ લીધી છે. એટલે કે સરેરાશ દર 15 રન ખર્ચ્યા બાદ યુઝવેન્દ્રને સરેરાસ 1 વિકેટ મળી છે.
પર્પલ કેપ માટે યુઝવેન્દ્ર ચહલ બાદ દિલ્હી કેપિટલ્સના કુલદીપ યાદવ (Kuldeep Yadav) અને સનરાઈઝર્સ હૈદરાબાદના ટી નટરાજન તરફથી સખત પડકારનો સામનો કરી રહ્યો છે. આ બંને બોલરોએ અત્યાર સુધીમાં 17-17 વિકેટ લીધી છે. કોલકાતા નાઈટ રાઈડર્સના ઉમેશ યાદવ અને રોયલ ચેલેન્જર્સ બેંગ્લોરના વાનિન્દુ હસરંગા પણ પર્પલ કેપની રેસમાં છે. બંને બોલરોએ 15-15 વિકેટ લીધી છે.