LPL 2025: હવે આ ક્રિકેટ લીગમાં પણ રમશે ભારતીય ખેલાડીઓ, પહેલીવાર આ ટુર્નામેન્ટમાં લેશે ભાગ
ભારતીય ખેલાડીઓ ટૂંક સમયમાં IPL સિવાય અન્ય એક ક્રિકેટ લીગમાં રમતા જોવા મળશે. લીગના ઈતિહાસમાં પહેલીવાર ભારતીય ખેલાડીઓ ભાગ લેશે. આ લીગ 1 ડિસેમ્બરથી શરૂ થવાની છે. આ લીગમાં કુલ પાંચ ટીમો ભાગ લેશે.
ક્રિકેટની દુનિયામાં ઘણી લીગ રમાય છે, જેમાંથી સૌથી પ્રખ્યાત IPL છે. દુનિયાના દરેક મોટા ક્રિકેટર ભારતમાં રમાતી આ લીગમાં ભાગ લે છે. જોકે, ટીમ ઈન્ડિયાના ખેલાડીઓ IPL સિવાય અન્ય કોઈ લીગમાં રમતા નથી. જોકે, ભારતીય ક્રિકેટમાંથી નિવૃત્તિ લીધા પછી, તેમને અન્ય કોઈ લીગમાં રમવાની છૂટ છે. ઘણા ભારતીય ખેલાડીઓ નિવૃત્તિ પછી વિવિધ લીગમાં રમે છે. હવે, આ યાદીમાં વધુ એક લીગ ઉમેરાવાની છે.
શ્રીલંકા પ્રીમિયર લીગમાં રમશે ભારતીય ખેલાડીઓ
શ્રીલંકામાં રમાતી લંકા પ્રીમિયર લીગની છઠ્ઠી સિઝન માટે એક મોટી જાહેરાત કરવામાં આવી છે. આ સિઝન 1 ડિસેમ્બર, 2025થી શરૂ થશે. આ વર્ષે, ટુર્નામેન્ટમાં એક ઐતિહાસિક પરિવર્તન જોવા મળશે. પહેલીવાર ભારતીય ક્રિકેટરો આ T20 લીગમાં ભાગ લેશે. સોમવારે આ મોટી જાહેરાત સાથે, આયોજકોએ ક્રિકેટ ચાહકોનો રોમાંચ વધારી દીધો છે. જોકે, આ લીગમાં કયા ભારતીય ખેલાડીઓ રમશે તેની વિગતો હજુ સુધી જાહેર કરવામાં આવી નથી.
5 ટીમો વચ્ચે 24 મેચ રમાશે
LPLમાં પાંચ ફ્રેન્ચાઈઝ ટીમો ભાગ લેશે, જેમાંથી દરેક લીગ તબક્કામાં બે વાર રમશે. LPL 2025માં કુલ 24 મેચ રમાશે, જેમાં 20 લીગ મેચ અને ચાર નોકઆઉટ મેચનો સમાવેશ થશે. બધી મેચો શ્રીલંકાના ત્રણ મુખ્ય સ્ટેડિયમ આર. પ્રેમદાસા ઈન્ટરનેશનલ ક્રિકેટ સ્ટેડિયમ કોલંબો, પલ્લેકેલે ઈન્ટરનેશનલ ક્રિકેટ સ્ટેડિયમ કેન્ડી અને રંગીરી દામ્બુલા ઈન્ટરનેશનલ ક્રિકેટ સ્ટેડિયમ દામ્બુલામાં રમાશે.
લીગ સ્ટેજ બાદ પ્લેઓફ અને ફાઈનલ
લીગ સ્ટેજના અંતે, ટોચની ચાર ટીમો પ્લેઓફમાં આગળ વધશે. પ્રથમ પ્લેઓફ મેચ ક્વોલિફાયર-1 ટોચની બે ટીમો વચ્ચે રમાશે, જેમાં વિજેતા ટીમ સીધી ફાઈનલમાં પહોંચશે. ત્રીજા અને ચોથા સ્થાને રહેલી ટીમો એલિમિનેટરમાં એકબીજાનો સામનો કરશે, આ મેચની વિજેતા બે ટીમ ક્વોલિફાયર-1 માં હારનાર ટીમ સામે ક્વોલિફાયર-2 માં રમશે. ક્વોલિફાયર-2 ની વિજેતા બીજી ફાઈનલિસ્ટ હશે.
LPL, ILT20 અને BBL સાથે યોજાશે
જોકે, આ વખતે લંકા પ્રીમિયર લીગ ઓસ્ટ્રેલિયાની બિગ બેશ લીગ (BBL) અને UAEની ILT20 સાથે જ યોજાશે. આ બંને લીગ ડિસેમ્બર 2025માં શરૂ થવાની છે. આ બધી લીગમાં ઘણા ખેલાડીઓ રમે છે. આ ખેલાડીઓએ એક લીગ પસંદ કરવી પડશે, જે બાકીની લીગ માટે એક મોટો આંચકો હશે. જોકે, આ નિર્ણય 2026ના વર્લ્ડ કપને ધ્યાનમાં રાખીને લેવામાં આવ્યો છે, જે આવતા વર્ષની શરૂઆતમાં રમવાનો છે.
આ પણ વાંચો: વર્લ્ડ કપ વિજેતા ખેલાડીનું નિધન, દિગ્ગજ ક્રિકેટરના અવસાનથી ક્રિકેટ જગતમાં છવાયો શોક
