India vs West Indies 2nd T20 Playing 11: વેસ્ટ ઈન્ડિઝે જીત્યો ટોસ, પ્રથમ બોલીંગ કરવાનો કર્યો નિર્ણય, જાણો બંને ટીમની પ્લેઈંગ ઈલેવન
IND Vs WI T20 Match Prediction Squads Today: ભારતે શ્રેણીની પ્રથમ મેચમાં વેસ્ટ ઈન્ડિઝને 68 રનના વિશાળ માર્જિનથી હરાવીને 1-0 ની સરસાઈ મેળવી લીધી છે.
ત્રણ કલાકના વિલંબ પછી, ભારત અને વેસ્ટ ઈન્ડિઝ (India vs West Indies) વચ્ચે પાંચ મેચની T20 શ્રેણીની બીજી મેચ શરૂ થઈ ગઈ છે. સેન્ટ કિટ્સના કે વોર્નર સ્ટેડિયમમાં આયોજિત આ મેચ ભારતીય સમય અનુસાર રાત્રે 8 વાગ્યે શરૂ થવાની હતી, પરંતુ ખેલાડીઓની કિટ્સ આવવામાં વિલંબને કારણે મેચને ત્રણ કલાક માટે સ્થગિત કરવી પડી હતી. 10.30 વાગ્યે ટોસ સાથે નક્કી થયું કે હવે ભારતીય સમયાનુસાર 11 કલાકે મેચ શરૂ થઈ છે. ટોસ વિશે વાત કરીએ તો, વેસ્ટ ઈન્ડિઝના કેપ્ટન નિકોલસ પૂરને અહીં જીત મેળવી અને પહેલા બોલિંગ કરવાનો નિર્ણય કર્યો.
ટીમ ઈન્ડિયામાં એક ફેરફાર
આ મેચ માટે બંને ટીમોએ કેટલાક ફેરફાર કર્યા છે. પહેલા ટીમ ઈન્ડિયાની વાત કરીએ. કેપ્ટન રોહિત શર્માએ ટોસ સમયે જણાવ્યું કે લેગ સ્પિનર રવિ બિશ્નોઈની જગ્યાએ ફાસ્ટ બોલર અવેશ ખાનનો સમાવેશ કરવામાં આવ્યો છે. કેપ્ટન રોહિત શર્માએ આ બદલાવ વિશે કહ્યું કે આ માત્ર સંજોગોને કારણે થયું છે અને કમનસીબે બિશ્નોઈને બહાર બેસવું પડ્યું છે. સેન્ટ કિટ્સમાં ફૂંકાતા જોરદાર પવનને જોતા ભારતીય ટીમે પેસ એટેકને પ્રાધાન્ય આપ્યું છે. વેસ્ટ ઈન્ડિઝે બે ફેરફાર કર્યા છે અને તેમાં બ્રાન્ડન કિંગ અને ડેવોન થોમસનો સમાવેશ કરવામાં આવ્યો છે.
ભારત પાસે સરસાઈ
પાંચ મેચોની શ્રેણીમાં ભારતીય ટીમ અત્યાર સુધી 1-0થી આગળ છે. ત્રિનિદાદમાં રમાયેલી પ્રથમ મેચમાં ભારતીય ટીમે પ્રથમ બેટિંગ કરી હતી. ટીમ માટે કેપ્ટન રોહિત શર્માએ જોરદાર અડધી સદી ફટકારી હતી, જ્યારે દિનેશ કાર્તિકે પણ શાનદાર ઇનિંગ રમી હતી, જેના આધારે ભારતે 190 રન બનાવ્યા હતા. જવાબમાં, ભારતે તેના સ્પિનરોના દમ પર વિન્ડીઝના દાવને માત્ર 122 રન પર જ સીમિત કરી દીધો અને મેચમાં 68 રનથી વિશાળ વિજય નોંધાવ્યો.
IND vs WI 2nd T20I: આજની પ્લેઇંગ XI
વેસ્ટ ઈન્ડિઝ: નિકોલસ પૂરન (કેપ્ટન), કાયલ મેયર્સ, બ્રાન્ડોન કિંગ, રોવમેન પોવેલ, શિમરોન હેટમાયર, જેસન હોલ્ડર, ઓડિયન સ્મિથ, ડેવોન થોમસ, અકીલ હુસેન, અલઝારી જોસેફ, ઓબેદ મેકકોય
ભારત: રોહિત શર્મા (કેપ્ટન), સૂર્યકુમાર યાદવ, શ્રેયસ ઐયર, ઋષભ પંત (વિકેટમકીપર), હાર્દિક પંડ્યા, દિનેશ કાર્તિક, રવિન્દ્ર જાડેજા, રવિચંદ્રન અશ્વિન, ભુવનેશ્વર કુમાર, અવેશ ખાન, અર્શદીપ સિંહ