વર્લ્ડ કપ વિજેતા ખેલાડીનું નિધન, દિગ્ગજ ક્રિકેટરના અવસાનથી ક્રિકેટ જગતમાં છવાયો શોક

ભારત અને વેસ્ટ ઈન્ડિઝ વચ્ચેની ટેસ્ટ શ્રેણી વચ્ચે એક ખરાબ સમાચાર આવ્યા છે. વેસ્ટ ઈન્ડિઝના દિગ્ગજ ક્રિકેટર બર્નાર્ડ જુલિયનનું અવસાન થયું હતું. તેઓ 75 વર્ષના હતા. બર્નાર્ડ જુલિયન 1975માં ક્રિકેટનો પ્રથમ ODI વર્લ્ડ કપ જીતનાર કેરેબિયન ટીમના સભ્ય હતા.

1975 વર્લ્ડ કપ વિજેતા ખેલાડીનું અવસાન

બર્નાર્ડ જુલિયને 1975ના વર્લ્ડ કપમાં વેસ્ટ ઈન્ડિઝની જીતમાં પણ મુખ્ય ભૂમિકા ભજવી હતી. બર્નાર્ડે ગ્રુપ સ્ટેજમાં શ્રીલંકા સામે 20 રન આપીને 4 વિકેટ લીધી હતી, જે બાદ સેમિફાઈનલમાં ન્યુઝીલેન્ડ સામે 27 રન આપીને 4 વિકેટ લીધી અને વર્લ્ડ કપ ફાઈનલમાં ઓસ્ટ્રેલિયા સામે 37 બોલમાં 26 રન બનાવીને પોતાની ટીમની જીતમાં મુખ્ય ભૂમિકા ભજવી હતી.

ક્રિકેટ વેસ્ટ ઈન્ડીઝ ક્રિકેટ બોર્ડે શોક વ્યક્ત કર્યો

બર્નાર્ડ જુલિયનના નિધન પર ક્રિકેટ વેસ્ટ ઈન્ડીઝે શોક વ્યક્ત કર્યો છે. વેસ્ટ ઈન્ડીઝ ક્રિકેટ બોર્ડે બર્નાર્ડના પરિવાર પ્રત્યે સંવેદના વ્યક્ત કરી અને કહ્યું કે વેસ્ટ ઈન્ડીઝ ક્રિકેટમાં બર્નાર્ડ જુલિયનનું યોગદાન ક્યારેય ભૂલાશે નહીં.

બર્નાર્ડ જુલિયનની આંતરરાષ્ટ્રીય કારકિર્દી

બર્નાર્ડ જુલિયને તેમની આંતરરાષ્ટ્રીય કારકિર્દીમાં કુલ 36 મેચ રમી હતી, જેમાં 24 ટેસ્ટ અને 12 વનડેનો સમાવેશ થાય છે. 24 ટેસ્ટમાં તેમણે 866 રન બનાવ્યા હતા અને 50 વિકેટ લીધી હતી. 12 વનડેમાં તેમણે 86 રન બનાવ્યા હતા અને 18 વિકેટ લીધી હતી. બર્નાર્ડ જુલિયને આંતરરાષ્ટ્રીય ક્રિકેટમાં પહેલી મેચ ઈંગ્લેન્ડ સામે રમી હતી, જ્યારે તેમની છેલ્લી મેચ પાકિસ્તાન સામે હતી. તેમની આંતરરાષ્ટ્રીય કારકિર્દી ચાર વર્ષ સુધી ચાલી હતી, જે 1973માં શરૂ થઈ અને 1977માં સમાપ્ત થઈ હતી.

ભારત સામે ટેસ્ટમાં પ્રદર્શન

ચાર વર્ષની આંતરરાષ્ટ્રીય કારકિર્દી દરમિયાન બર્નાર્ડ જુલિયને ભારત સામે આઠ ટેસ્ટ રમી, જેમાં 204 રન બનાવ્યા અને 11 વિકેટ લીધી. આ દરમિયાન, તેમણે ભારતમાં ચાર ટેસ્ટ રમી અને બાકીની ચાર વેસ્ટ ઈન્ડીઝમાં રમી. ભારતમાં, તેમણે 93 રન બનાવ્યા અને નવ વિકેટ લીધી. વેસ્ટ ઈન્ડીઝમાં તેમણે ભારત સામે 111 રન બનાવ્યા અને બે વિકેટ લીધી.

આ પણ વાંચો: રવિન્દ્ર જાડેજાએ જીત્યો પ્લેયર ઓફ ધ મેચનો એવોર્ડ, પરંતુ ઉજવણી એક કલાકમાં જ ફિક્કી પડી ગઈ, જાણો કેમ

ક્રિકેટ સહિત રમતગમતના દરેક સમાચાર વાંચવા અહીં ક્લિક કરો