Ahmedabad Youth Congress: યુથ કોંગ્રેસની મિટિંગમાં છુટ્ટા હાથની મારામારી ! મહિલા સભ્યોની હાજરીમાં ગાળાગાળીથી નેતાઓ શરમમાં પડ્યા

Ahmedabad Youth Congress: કોંગ્રેસના પ્રદેશ કાર્યાલય ખાતે મળેલી યુથ કોંગ્રેસની આજની મિટિંગમાં બે જુથ સામ સામે આવી ગયા, મિટિંગમાં પ્રદેશ પ્રમુખ અમિત ચાવડા અને વિરોધ પક્ષના નેતા પરેશ ધાનાણી સહિત આઈ.વાય.સી. ના પ્રભારી તેમજ સિનિયર નેતા ભરતસિંહ સોલંકી પણ હાજર હતા.

સૂત્રોના જણાવ્યા મુજબ વાત એટલી હદ સુધી વણસી કે ગાળાગાળી પણ થઈ અને ત્યારબાદ મારામારીની પણ ઘટના બની. સિનિયર નેતાઓની હાજરીમાં બનેલી આ ઘટના ખૂબ જ ગંભીર કહેવાય, યુથ કોંગ્રેસની આ મિટિંગમાં મહિલા સભ્યો પણ હાજર હતી, જેમને બહાર નીકળી જવાની ફરજ પડી હતી.

જો કે આ મામલે યુથ કોંગ્રેસના પ્રદેશ પ્રમુખ અને થરાદના ધારાસભ્ય ગુલાબસિંહ રાજપૂતનું કહેવું છે કે ઉંમરના પ્રશ્નને લઈને રજુઆત જરૂર હતી પણ બોલાચાલી કે મારામારીની વાત ખોટી છે આવું કઈ બન્યું જ નથી.

આ મિટિંગમાં યુથ કોંગ્રેસના નેતા વિશ્વનાથસિંહ વાઘેલા અને પૂર્વ એન.એસ.યુ.આઇ. પ્રદેશ અધ્યક્ષ ઇન્દ્રવિજયસિંહ ગોહિલના ગ્રુપના લોકો સામ સામે આવ્યા હોવાનું મનાઈ રહ્યું છે. હવે આ ઘટના પર પડદો પાડવાનો પ્રયાસ થઈ રહ્યો છે, પણ કોંગ્રેસમાં જુથબંધીની બાબત કોઈ નવાઈ નથી. આ મામલે હવે સિનિયર નેતાઓ કેવા પ્રકારનાં પગલા ભરે છે તેના પર સૌ કોઈની નજર ટકેલી છે.